2009ko irailean auzipetu zituen Baltasar Garzon Espainiako Auzitegi Nazionaleko epaileak aipatu 13 lagunak, "ETAko kide izatea edo erakunde armatua laguntzea" egotzita. Urte hartako martxoan D3Mk eta Askatasunak Eusko Legebiltzarrerako hauteskundeetara aurkeztu nahi izan zuten, baina Auzitegi Gorenak baliogabe utzi zituen, Batasuna legez kanpoko alderdiarekin harremana zutelakoan. Fiskalak 9 urteko espetxe zigorra eskatzen du Rodrigo, Zubiaga eta Urkaregirentzat.
Atxiloketak eta espetxea
Iker Rodrigo, Eli Zubiaga, Arantza Urkaregi eta beste bost herritar 2009ko urtarrilaren 23an atxilotu zituen Espainiako Poliziak, D3Mren aurkako operazioan. Zortziak 2010eko martxoaren bukaeran atera ziren kartzelatik.
D3M eta Askatasunaren aurkako epaiketa bertan behera uztea eskatu dio ezker abertzaleak PPri
Espainiako Auzitegi Nazionalak apiriletik aurrera D3M eta Askatasunarekin lotutako hamahiru lagun epaituko dituela salatu zuen atzo ezker abertzaleak, "epaiketa hori ilegalizazio politiken luzapena baita, argi eta garbi". Auzipetuekin batera eman zuten prentsaurrekoa, Bilbon. Besteak beste, horien artean dira Iker Rodrigo lutxanarra, Eli Zubiaga algortarra eta Arantza Urkaregi Leioa eta Erandioko campuseko irakasle bilbotarra. Maribi Ugarteburu ezker abertzaleko kideak esan zuenez, Espainiako Estatuak "blokeo estrategiarekin erantzuten" jarraitzen du Euskal Herrian ireki den egoera berriaren aurrean. Espainiari estrategia hori uzteko eskatu zion, eta, lehen pauso gisa, "salbuespen neurriak" bertan behera lagatzeko: egungo kartzela politika amaitu, orain arte legez kanporatutako antolakunde politikoak legeztatu eta militante politikoen jazarpena alde batera utzi —epaiketa politikoak barne—. "Politika egiteko garaia da", aipatu zuenez. Argazkian, orduko atxiloketak salatzeko manifestazioa Algortan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun