Lanuzte eta mobilizazioak areagotuko dituzte otsailean Metro Bilbaoko langileek
Txema Oleaga Metro Bilbaoko presidente berriak astearteko bileran mahai gainean jarritako proposamena "etsigarritzat" jo du Greba Batzordeak, “ez dituelako langileengan sortutako esperantzak asetzen”. Horren aurrean, eta langileekin bi asanblada izan eta gero, greba egutegi berria aurkeztu zuten herenegun izandako prentsaurrekoan ELA, CIM, UGT, LAB eta ESK sindikatuek. Horrenbestez, asteazkenean, otsailak 8, elkarretaratzea egingo dute Bilboko auzitegietan; hilaren 9an lanuztea egingo dute; 14an elkarretaratzea egongo da soldata izozteen kontra; otsailaren 16an lanuztea eta manifestazioa egingo dituzte eta hilaren 23an 8 orduko greba egongo da; martxoaren 1erako ere lanuzte deialdia egin dute. Hala ere, datak gehitu edo moldatu daitezkeela azpimarratu zuten. Sindikatuek azaldu zutenez, orain arteko grebak bi edo hiru ordukoak izan dira, baina hemendik aurrera lau eta zortzi ordu bitarteko lanuzteak burutuko dituzte. Greba Batzordeak prentsaurrekoan jakitera eman zuenez, “bilera eta negoziazio guztiak mobilizazioekin bateratuko” dituzte eta dagoeneko, langileen asanbladak mobilizazio eta greba egutegia adostua du. Argazkian, geldialdiarekin batera, dozenaka langilek egin zuten manifestazioa urtarrilaren 19an / © LAB Metro Bilbao.
Metro Bilbaoko Greba Batzordeak gogora ekarri zuenez, urtarrilean “mobilizazioak eta lanuzteak etetea erabaki” zuten “akordiorako bidea errazteko eta arazoa behingoz konpontzeko”, baina zuzendaritzaren erantzuna ikusita lanuzteetara bueltatzea erabaki dute, “dirudienez, zuzendaritzak ulertzen duen hizkuntza bakarra hori” delako. Zuzendaritzak asteartean emandako erantzuna, Iñaki Pregok abenduan egindakoaren “oso antzekoa” dela salatu zuten sindikatuetako ordezkariek eta, ondorioz, Oleaga “bildots larruz jantzitako otso gisa jokatzen ari” dela salatu zuten. Gatazkaren aurrean, Greba Batzordeak zuzendaritzari “konponbide-proposamena aurkeztuko” diola jakinarazi zuten, “konponbideak orokorra eta egiturazkoa izan behar duela” gogora ekarriz. Era berean, “langileen eta sindikatuen eskubideak errespetatzea bermatuko duen irtenbide orokorra beharrezkoa” dela esan zuten eta “gestio gardena eta informazioa langileen ordezkaritza-organoetara heltzea bermatuko duen irtenbidea” bilatzen dutela.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun