Era berean, Landak Getxoko alkate ere izandako Jose Antonio Agirreren hitz batzuk gogoratu zituen: “gorrotoak hondamena baino ez dakar, eta guk ez dugu suntsiketarik nahi, batu baino ez, gura dugu eraikitzeko”.
Ekitaldiko argazkiak (© Getxoko Udala)
"1936ko gerran, aurreko gatazka zibiletan eta frankismo garaian Getxo udalerrian izandako biktimei" gorazarre egin zien igande eguerdian Udalbatzak, Imanol Landa alkate jelkidea buru zela. Omenaldian, Udalean ordezkaritza politikoa duten talde guztietako (EAJ, PP, Bildu eta PSE-EE) ordezkariak izan ziren, baita zendutakoen senide batzuk ere. Aipatu ekitaldia urtero egitea erabaki zuten 2009ko martxoko osoko bilkuran. Horrenbestez, Galeako ibiltokian iaz lekututako “Liburuaren oroimena” eskulturaren ondoan lore sorta utzi zuen Landak. Halaber, txistulari batek "Agur jaunak" jo zuen eta minutu bateko isilunea egin zuten hurbildutakoek. Alkate getxoztarrak adierazi zuenez (mp3), “urtero gorazarre publikoa egiteko konpromiso argia dugu, omenaldi xume eta hunkigarria, biktima guztiei errespetua aitortuz eta oroituz, gorrotoa alboratuz; bihotz-bihotzeko omenaldia egin behar diegulako, beti ere adiskidetze eta elkartasun giroan. Getxon, justizia historikoaren onerako, ez dugulako ahaztuko gure historiako gertaera beltz eta mingarri horietako biktimen egiazkotasuna”. Argazkia: © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun