Kaleratutako langileek LABen ahotik adierazi dutenez, "nagusiak kaleratze-gutunean arrazoi ekonomikoak aipatzen ditu. Dagoeneko enpresa bideragarria ez dela esan eta Gizarte Segurantzan bere erretirorako paperak aurkeztu dituela gogorarazten du. Kaleratze-gutun berean, langile bakoitzari aitortzen digun kalte-ordaina lan-urteko 20 eguneko soldatakoa da (20.000 euro inguru langileko)". Baina, beharginek ez dituzte kaleratzeak onartzen, ezta kalte-ordainak ere. Beraien lanpostuak mantendu nahi dituzte. "Gure aldarrikapenaren aurrean erantzuna da langile hauekin ez duela jarraitu nahi, gure baldintza ekonomikoei erreferentzia eginez; baina guk Eraikuntzako Bizkaiko Lan-hitzarmenean jasotakoa baino ez dugu kobratzen", amaitu dutenez.
Kaleratzeak salatzeko kontzentrazioa Sopelan
LABek deituta, 60 lagun inguru elkartu ziren atzo Sopelan, Zamudioko Eraimen SL enpresan izandako kaleratzeak salatzeko. Sindikatu abertzaleak zabaldu duenez, jabeak, Francisco Javier Azkargorta Belando sopeloztarrak, otsailaren 3an itxi zuen lantokia, bost behargin langabezian utziz. 15 urteko antzinatasuna dute guztiek eta 40-50 urte artean dira. Lanean enpresa berean urte luzez egon ondoren kaleratzen dituzten langileen beste kronika bat dirudien arren, "honi kapitulu bat gehitzen zaio", LABen arabera: "Baina, honi, kapitulu bat gehitzen zaio: Eraimeneko jabearen semea 2009etik eraikuntza-enpresa baten jabea da, Ingenieria y Construccion Eraikiz SL, eta aldi berean Eraimen SLn ahalduna ere bada. Azken hilabeteotan enpresa batetik bestera lana, hornitzaileak, bezeroak… pasatu ditu, baina langileak ere pasatzea ahaztu zaio", kritikatu du sindikatuak. Hori dela eta, bi enpresen jarrera "onartezina" dela dio langile erakundeak, "irabaziak handitzeko, bost beharginak kalean utzi eta baldintza prekarioetan berriak kontratatzea delako beraien asmoa".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun