Bulebarrean dagoen gune estalia handitzeko proiektua esleitu berri du Leioako Udalak. Horrela, gaur egungo 442 metro koadrotik 1.092 metro koadro izatera pasatuko da aipatu eremua, Eneko Arruebarrena alkate jelkideak ostiralean emandako prentsaurrekoan iragarri zuenez. Proiektuaren arabera, egun estalita dagoen guneari beste elementu bat gehituko zaio albo batean. "Kontuan izan behar dugu elementu hau irekia, arina eta aurreko eraikinarekin errespetu osoz egingo dela. Hain zuzen ere, aurreko eraikinaren arkitektoa izan da handitze proiektua egin duena; Iñaki Aurrekoetxea, alegia. Gauzak horrela, elementu independentea izango da eta nortasun berekoa, baina egun dagoen elementuarekin lotura izango duena albo batetik", azaldu zuen tokiko agintariak. Modu horretan, Bulebarraren gune estalia nabari handituko da eta horrek hainbat ekintza hartzeko aukera emango du. Arruebarrenak argitu duenez, besteak beste, Leioako Merkatarien Elkarteak bere interesa helarazi dio Udalari bertan azoka eta ekintza desberdinak egiteko. Obra horiek, 196.942,61 euroko aurrekontua dutenak, urte honetako lehen hiruhilekoan hasiko dira eta lau hilabete iraungo dute. Argazkia: © Leioako Udala.
Leioa zeharkatzen duen Avanzada errepidea estaltzeko eraiki zuten Bulebarra 1990ean. Tunel faltsu horrek 300 metroko luzera du eta 25 metrotako zabalera, erdialdean 7.500 metro koadroko gunea sortuz herriaren erdialdean eta albo bietako errailen artean. Zehazki, Bulebarrean dagoen gune estaliak, "stoa" izena hartu zuenak, arkitektura klasikoa du. Guztira 85 metro koadro luzerako estruktura da, sei metrotako aterpearekin eta lau metroko zabalerarekin. Hegoaldean adreiluzko itxura du eta gainontzekoa altzairuzkoa da, kristalezko estalkiarekin.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun