Itxartu taldeko Ricardo Ansotegik aipatu duenez, mila erditik gora atleta espero dituzte igandeko lasterketan, “azken urteotan kros honek izan duen gorakadari erreparatuz". "2007an 176 lagun izan ziren eta 479 korrikalari 2011n. Hazkunde hori guk antolatutako beste kirol proba batzuetan ere eman da, esate baterako, ibilaldi neurtuan, Getxoko Milian edo Itziar Lopez e Uralde Oroi-Lasterketan”, gaineratu duenez.
Zirkulazio neurriak
Algortako Etorbidean eta inguruko kaleetan bidea itxiko dute tarteka ibilgailuentzat, igande honetan, 11:00etatik 13:15era, Itxartu Taldearen Krosa dela eta. Zehazki, 11:00etatik 11:30era, Andres Kortina eta Mariandresena artean zarratuta egongo da, eta ordu horretatik aurrera eskumako bidetik soilik ibili ahal izango dira autoak. Bestalde, 11:00etatik 13:00etara, Zabala eta Torrene kaleetako garajeetako sartu-irtenak ere baldintzatuko ditu lasterketak, eta hartara, maila desberdinetako proba bata eta bestearen artean ibili ahal izango dira kotxeak. Ameztiko irteeran (Algortako Etorbidera) ere eragina izango du krosak: proba bata eta bestearen artean ibili ahal izango da soilik (11:30etik 13:00era). Azkenik, 11:30etik 13:00era, eskumako erreia baino ezin izango da erabili Mariandresena eta Telletxe kaleetan (Algortako Etorbideko bidegurutzeraino).
Igande honetan, otsailak 12, hasiera emango zaio atletismo proba herrikoien aurtengo egutegiari Getxo udalerrian, Algorta erdigunea hartuko duen Itxartu Taldea Krosaren 26. edizioaren bitartez. Orotara, hamar kategorietan lehiatuko dira korrikalariak. Horrenbestez, txikiak izango dira lehiatzen lehenengoak goizeko 11etan Algortako Etorbidetik, batzoki aurretik, abiatuta; 330 metroko ibilbidea osatzeko asmoz. Irteten azkenak, berriz, senior mailakoak izango dira: 12:30ean daukate hitzordua, 5.500 metro osatzeko. Lasterketa guztietan neska eta mutilak arituko dira batera, nahiz eta kategoria bakoitzean bi sailkapen egongo diren. Maila bakoitzeko irabazleei emango zaizkien garaikurrez gainera, ume mailako eta adin txikiko guztiei oparitxo bana emango zaie batzoki aurreko helmugara iritsitakoan. Izen-ematea doakoa izango da parte-hartzaile guztientzat eta, ostiralera arte, hilaren 10era arte, egin ahal izango da itxartu.itxartu[abildua]gmail.com-en, Kantxa Kirol Modan edo Gaztañaga Kirolak dendan; edo krosaren egun berean, proba bakoitzaren hasiera baino ordu erdi lehenago, irteera lekuan. Argazkian, Alvaro Gonzalez Kirol zinegotzia eta Ricardo Ansotegi Itxartuko kidea gaurko aurkezpenean / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun