Bizkaiko Foru Aldundiko Euskara Zuzendaritza Nagusiak abian jarri du D ereduko zentroetan aurrez matrikulatzeko kanpaina berria, Udalekin batera. Alkarbidek sustatutako egitasmoa Bizkaiko 43 udalerri eta hiru mankomunitateren ekimen bateratua da eta informazio-kanpaina urte hasieran zabaldu zen, 2-3 urteko umeen eskolatze-aldia baino zertxobait lehenago, gurasoek bidalitako informazioaren inguruan hausnarketa egiteko astia izan zezaten. Alkarbidek koordinatu duen ekimen honetan guztira 8.000 liburuxka banatu dira kanpainan parte hartu duten udalerrietan. Umeak eskolan lehen aldiz matrikulatzen dituzten gurasoei D ereduari buruzko informazioa ematea eta eredu hori aukeratzeko arrazoiak azpimarratzea izan da kanpainaren helburu nagusia.
"Euskara plus bat da haurren hezkuntzan, eta, gainera, komunikatzeko eta pertsona gisa trebatzeko aukerak zabaltze dizkie. Modu bakarra da umeek euskara eta gaztelania ondo ikasteko. Gainera, egindako azterketen arabera, D ereduan matrikulatuta dauden ikasleek errendimendu hobea dute, eta emaitza hobeak lortzen dituzte. Halaber, horrek erraztu egiten die hirugarren edo laugarren hizkuntza bat ikastea. Zalantzarik gabe, etorkizuneko apustua da, lanerako aukera gehiago izango dituzte", azaldu du Alkarbidek.
Aurten ere gurasoek bi edo hiru urte bitarteko haurrak D ereduan matrikulatzeko ekimenari batu zaizkio eskualdeko ia udal guztiak. Izan ere, Getxoko Udalak izan ezik, Uribe Kostako Mankomunitateko tokiko erakunde guztiek (Barrika, Berango, Gorliz, Lemoiz, Plentzia, Sopela eta Urduliz) eta Leioa zein Erandioko udalek Alkarbidek koordinatutako kanpaina zabaltzen dihardute; "D bitamina, aberastu bere heziketa!" leloa beraiena eginez. Getxoko Udalak, bere aldetik, udalerriko ikastetxeen gidaliburua plazaratzera mugatu da, A, B eta D ereduak maila berean jarriz. Horrenbestez, gaur da Internet bidez aurrez izena emateko azken eguna. Bihar, berriz, aurrematrikula ikastetxeetan bertan egiteko azken eguna izango da. Argazkian, Betiko ikastolako ikasle, irakasle eta gurasoak Lodosako Ibaialde ikastolaren alde / © Betiko ikastola.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun