Bihotzez sortzetiko kardiopatiak dituzten umeen familien elkarteak eta
Leioako Udalak jaialdia antolatu dute larunbat honetarako, otsailak 11, Kandelazubieta kiroldegian. Horrenbestez, arratsaldeko lauetatik aurrera, ekintza dibertigarri eta irekiak egingo dituzte; tartean, Travellin’ Brothers talde leioaztarraren kontzertua. Bihotzez elkartearen helburuak bi dira: alde batetik, herritarrak gaixotasun horrekin eta bere inguruarekin sentsibilizatzea eta kontzientziatzea. Bestalde, kardiopatiak dituzten umeen eta euren senitartekoen bizi-kalitatea hobetu nahi dute. Horiek betetzeko mota desberdinetako ekintzak egiten dituzte: zabaltze ekintzak, sentsibilizatzekoak, aldarrikapen ekintzak, profesionalei zuzenduriko heziketa zabaltzea eta indartzea, eta senitartekoei zuzenduriko laguntza (informazioa, laguntza ekonomikoa edo psikologikoa, eta abar). Argazkian, haur eta gurasoak jolasean Leioan / © Herrigune Leioa.