“Bazen behin Erromon...” lelopean, larunbat honetarako, otsailak 18, Inauteriak ospatzeko ekitaldiak antolatu dituzte Itzubaltzeta / Romo eta Pinuetako jai batzordeak, Itzubaltzeta gaztetxeak, Zasi Eskola dantza taldeak eta Ziztu Bizian eskaut taldeak. Adin guztientzako jarduerak egongo dira: umeentzako jolasak, musika emanaldiak, sariketak... Gauzak horrela, 12:00etatik 14:30era izango dira txikientzako rokodromoa, puzgarriak, buruhandiak, ping-pong eta mahai-futbola, Santa Eugenia plazan. Tartean, umeen mozorro lehiaketa egingo dute 13:30ean. Arratsaldean, berriz, Pinueta aldean izango dira ospakizunak. 17:30ean, txokolatada egingo dute Cervantes plazan eta, ordu erdi beranduago, bertatik abiatuko dira kalejiran. Santa Eugenia plazara bueltatuta, 20:00etan hasiko da erromeria, Trikizio taldeak girotuta. Gauerako, mozorro lehiaketa antolatu dute tabernek. Argazkian, orain hiru urte dozena bat indio apatxe identifikatu zituen Ertzaintzak, Itzubaltzetako Inauterietan.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
