Euskal Herriko Unibertsitateko (EHU) hiru campusek Ate Irekien Jardunaldiak hartuko dituzte martxoaren 12tik 15era bitartean. Horietan, EHUk bere ateak zabalduko dizkie Araba, Bizkaia eta Gipuzkoako unibertsitate-aurreko ikasle guztiei, bere irakaskuntza eta azpiegitura bertatik bertara ikusi eta erakutsi ahal izateko. "Horrela, etorkizuneko ikasleek ikasi nahi duten karreraren inguruan laster hartu behar duten erabakia errazago hartu ahal izango dute", tokiko iturriek adierazi dutenez. Hiru campusetako unibertsitate ikastegi bakoitzean bi jarduera egingo dira, euskaraz zein espainolez: karrerei buruzko informazio-hitzaldiak eta ikastegiko eraikinera bisita. Jardunaldietan parte hartu ahal izateko unibertsitateko aurreko ikasleak beren ikastegietako orientatzaileekin otsailaren 20a baino lehen harremanetan jarri beharko dira. Argazkian, ikasle batzuk Irakasleen Eskolako eraikin berrirantz abiatzen artxiboko irudi batean / © EHU.
EHUk urterik urtera Sarbiderako Programaren barruan burutu ohi dituen jardueren barruan daude Ate Irekien Jardunaldiak, unibertsitate-aurreko ikasleek ikasketak aukeratu baino lehen ahalik eta informaziorik zabalena izan dezaten. Jardunaldiak, hain zuzen, programaren azken fasean daude. Batxilergo eta Goi Mailako Hezkuntza Zikloetako orientatzaileei zuzenduriko topaketa batzuekin hasi zen eta, Unibertsitate Orientaziorako Azoken ostean, Ate Irekien Jardunaldiekin bukatuko da. Duela gutxi egindako Unibertsitate Orientaziorako Azokek 6.775 bisitari izan zituzten, 2010eko edizioan izandako parte-hartzaileen kopuruan (6.372 bisitari) gora eginez. Ikastegi guztietako irakasleek nahiz unibertsitateko zenbait zerbitzutako langileek informazio zehatza eman zieten ikasleei EHUk eskainiko dituen gradu guztien gainean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun