Heldu dira jada Inauteriak Algortara

Erabiltzailearen aurpegia Ukberri 2012ko ots. 17a, 18:08

Ikastetxeek eta Getxoko Kultur Etxeak antolatutako Eskola Inauterien bidez heldu dira gaur Inauteriak Algortara. Mozorrotutako ehunaka umek hartu dituzte goizetik herriko kaleak. Bihar, Algortako San Inazioetako jai batzordeak Udalaren laguntzaz prestatutako jarduerei txanda helduko zaie. Aipatu ospakizunei "kutsu herrikoiagoa emateaz gain, kaleko giroa eta bizitza suspertu" gura dituzte. Bide horretan, larunbat honetarako, otsailak 18, bereziki txikiei eskainitako eguna prestatu dute. Tailerrak eta disko-festarekin batera, mozorro jaitsiera eta txokolatada ere izango dituzte neska-mutikoek. Iluntzean, Aldatz taldeak jarriko ditu dantzan haur zein aita-amak. Hurrengo larunbatean, hilak 25, bihotzez ume izan arren, adinez nagusiagoak direnei helduko zaie txanda. Horrenbestez, kaleak mila kolorez janzteko asmoz, orain urteak egiten zen mozorro txapelketa (taldeka) berreskuratu dute, 40 bat tabernen laguntzaz. Tartean, mozorro herri bazkaria izango da Telletxen (euria egitekotan Zabala eskoletan), menua paella gozoa dela. Gau partean, berriz, aukera bi: batetik, Garraxi taldeak eskainiko du dantzaldia, Telletxen. Bestetik, Hamaiketan, Governors eta Vendetta taldeek emango dute kontzertua, Portu Zaharrean. Zintzurrak bustitzeko aukera ere egongo da behean, jai batzordeak txosna jarriko baitu. Argazkian, txikienak prest dira jada herri Inauteriak abiatzeko / cc-by Algortako San Inazioak.

Gogoratu hilaren 22ra arte eskuratu ahal izango direla mozorro herri bazkarirako txartelak ondoko lekuetan: Eztabaida gune antiautoritarioa, Kantxa Kirol Moda, Sustrai eta Baserri. 7 euroren truke paella gozoa dastatzeko aukera egongo da, ogia, edariak (ardoa eta ura) eta postrea barne. Mozorro txapelketari dagokionez, taldekakoa izango da eta Kantxa Kirol Moda dendan izena eman beharko da, azken eguna hilaren 24a dela. Bertan emango zaizkie lehiaketaren oinarriak (beherago ere badaude) parte-hartzaileei. Sarietan 500, 350 eta 200 euro banatuko dira, lehenengo hiruren artean. Hain zuzen ere, Portu Zaharreko kontzertuak bukatuta ezagutzera emango dira saritutako koadrilen izenak. Sari bereziak ere izango dira.

Egitaraua:

Otsailak 18, larunbata. Umeen mozorro eguna

11:30 Umeentzako tailerrak, Telletxen.
12:00 Euskal Inauterietako kalejira (Agurra Dantzari Taldea).
12:30 Mundakako Atorrak eta Lamiak (Itxartu Dantzari Taldea).
13:00 Diskofesta, Detraka Makin Eroa, Telletxen.
17:30 Umeen mozorro jaitsiera Telletxetik.
18:30 Umeentzako txokolatada, Telletxen.
19:00 Erromeria Aldats taldearekin, Telletxen.

Otsailak 19, igandea

12:30 Erraldoi eta buruhandien konpartsa (Agurra Dantza Taldea): Sarrikobaso, Telletxe, Tangora, Sarrikobaso.

Otsailak 25, larunbata. Koadrilen mozorro eguna

Koadrilen mozorro txapelketa, egun guztian zehar. Izen-ematea Kantxa Kirol Modan, hilaren 24ra arte. Bertan emango zaizkizue lehiaketaren oinarriak. Sariak: 500, 350 eta 200 euro.
13:00 Mozorro txapelketaren 1. puntuazio saioa, Telletxen.
14:30 Mozorro herri bazkaria, Telletxen. Euria egitekotan Zabala eskoletan. Menua: paella (postrea, ogia, ardoa eta ura barne). Txartelak 7 eurotan salgai Eztabaidan, Baserrin, Sustrain eta Kantxa Kirol Modan; hilaren 22ra arte.
16:00 Duo Deno bikotea: euskal kantak, Telletxen.
19:00 Mozorro txapelketaren 2. puntuazio saioa, Telletxen.
19:30 Mozorro poteoa, Telletxetik Portu Zaharrera.
20:00 Erromeria (1. zatia) Garraxi taldearekin, Telletxen.
21:30 Kontzertuak: Hamaiketan, Governors eta Vendetta (Portu Zaharra).
21:00 Erromeria (2. zatia) Garraxi taldearekin, Telletxen.
Kontzertuak amaitzean, mozorro txapelketaren sari banaketa.

Mozorro lehiaketaren oinarriak

Kultura Getxo
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun