Gorlizko Foru Abeletxearen bidez, 12 abelburu emango dizkio dohaintzan Aldundiko Nekazaritza Sailak Bizkaiko Elikagaien Bankuari. Zentro gorliztarrak garatzen duen arraza piriniarra hautatzeko programatik jaso dira abereak, eta hilabete honetan bertan hilko dira. Orotara, 2011n 20 abelburu eta 5.000 kilo haragi inguru bidali ziren Bizkaiko Elikagaien Bankura, dena zatituta, xerratan eta hutsean ontziratuta. "Gorlizko Foru Abeletxearen xedea ez da abereak haztea gero hiltzeko, ez eta haragia ekoiztea ere; aitzitik, genetika hobetzea da helburua, ondoren semen bidez sektorean hedatuko dena, zekorrak lagatzea, enkanteak… Soilik hautaketa genetikoaren programan baztertzen diren animaliak bidaltzen dira hiltegira, baina horrek ez du esan nahi haragi kalitate bikaineko animaliak ez direnik" azaldu du Irene Pardo Nekazaritzako foru diputatuak. Argazkian, Gorlizko abeletxea / © Bizkaia.net.
Bizkaiko Foru Aldundiak berritu egin du elikagaiak xahutzearen aurkako Bizkaiko Elikagaien Bankua elkartearekin zuen kolaborazio hitzarmena. Bankua irabazi asmorik gabeko elkartea da, interes sozial, humanitario eta ekonomikoak dituena eta helburutzat du xahutzearen eta gizarte bazterkeriaren aurka egitea. Xede nagusi hori lortzeko, elkarteak egoera onean egon arren bota egingo liratekeen elikagai soberakinak lortzen eta aprobetxatzen ditu. Lan horretan, boluntarioek elikagaiak bilatzen, eskatzen eta berreskuratzen dituzte, eta lurraldeko irabazi asmorik gabeko erakundeei eta pertsonei helarazten dizkiete. Erabakiari esker, "Bizkaiko Elikagaien Bankuaren Gizarte Jarduna 2012" programari erantzuteko lankidetza finkatu da. Orotara, urteko laguntza 12.000 eurokoa izango da. Erabakiaren bidez, Bizkaiko Elikagaien Bankuak elikagaiez hornitzeko konpromisoa hartu du, zenbait hornidura iturriri esker. Horretaz gain, elikagaiak sailkatu eta bildu, erakunde sozialei banatu eta kudeaketaren barne antolaketarako ardura ere bere gain hartu du. Lankidetza horrez gain, Bizkaiko Foru Aldundiak jabetzan duen pabiloi bat laga dio erakundeari elikagaien biltegi gisa erabil dezan. Izan ere, 2011ko apirilaren 11n sute batek erakundearen instalazioak suntsitu zituen eta hortaz, nabe nagusi gabe geratu zen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun