Gaueko futbito txapelketa arina egingo dute Leioako Elkartasun Egunaren bezperan
Pasa den urtarrilaren 7an Bilbon burututako presoen aldeko ekimen "kolosalaren" itzalpean, "euskal preso politikoen eskubideak agenda politiko, sozial eta kulturalaren erdigunean" jartzeko erronka hartu zuen Leioako auzokide talde batek. Bi aste beranduago abian jarritako "Pausutxu bet aurrera" dinamikak bere lehen urratsa jarri zion martxoaren 10ean zein bezperan ospatuko duten Elkartasun Egunari. Beste gauza askoren artean, hilaren 9an, euskal presoen aldeko gaueko futbito txapelketa arina egingo dute Leioan. Talde bakoitzak bost pertsonaz osatuta egon behar du; neskenak, mutilenak edo mistoak izan daitezke! "Adinak ere ez du inporta, jakin badakigu esperientzia eta teknika fisikoa baino askoz inportanteagoa dela!", adierazi dute antolatzaileek. Izena emateko pausutxubet[abildua]gmail.com helbide elektronikora idaztea baino ez dago, telefono zenbakia edo e-maila eta izena jarriz. Facebook bidez ere egin daiteke.
Musika eta jatekoa ere egongo da txapelketari giro paregabea emateko. "Epaile profesionalak etorriko dira noski, inork ere ez dezan tranparik egin!", gaineratu dutenez. Printzipioz Sakoneta institutuko patioan jokatuko dute, martxoaren 9an, arratsaldeko 8etatik gauerdira arte. Arazorik egotekotan beste leku batean egingo dute. Talde finalistek "finala mundialean" neurtuko dira Elkartasun Egunean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun