Informazio puntura gerturatzen diren pertsona guztiei, edukiontzi berdean zer utzi behar den eta zer ez den utzi behar ezagutzera ematen duen jolas ezberdinetan parte hartzera gonbidatuko zaie, egunerokotasunean agertzen diren zalantzak argitzeko asmoz, udal iturriek zehaztu dutenez. Edukiontzi berdean, soilik beirazko botila, pote eta flaskoak utzi behar dira. Zeramika, portzelana, ispilu eta leihoetako kristalak, bonbilla, fluoreszenteak, tapak, tapoi eta txapak, kortxoak, plastikozko poltsak... ez dira edukiontzi berdean utzi behar, eta zergatiak bertan argituko dira.
Beirak bizitza asko izan ditzake
“Beirak bizitza asko izan ditzake, birziklatu” lelopean, kanpaina hau biztanleria osoari zuzenduta dago eta, aipatu bezala, informazio puntu ibiltari batean oinarritzen da. Informazio puntu horrek, beiraren edukiontzi berdera bota beharreko beira ontzien inguruan hainbat galdera dituzten herritarrei informatzea du helburu: beira %100ean birziklagarria den materiala da, beiraren birziklapen zikloa, edukiontzi berdean utzi behar dena eta ez dena, norbanakoak beiraren birziklapenaren zikloan duen garrantzia.... Azalpen horiek guztiak oinarri informatzaile eta jolas parte-hartzaileetan egongo dira oinarrituta. Gainera, partehartzaileek beira-ale erakargarriekin egindako lepokoak, eskumuturrekoak... sor ditzakete.
Ecovidrio erakundearekin batera, beiraren gaikako bilketaren aldeko sentsibilizazio kanpainaren edizio berri bat garatuko du ostegun honetatik aurrera Getxoko Udalak, "jasotako leiar kopurua eta kalitatea gehitzeko eta hobetzeko asmoz". Jolasak dituzten informazio puntuen eta birziklatutako beira aleen eskulan tailerraren saioak hilaren 23an, 24an eta 25ean egingo dituzte Areetako Xake plazan. Lehenengo eguneko ordutegia 10:30etik 13:30era artekoa izango da; bigarrenean, 17:30etik 20:30era; eta hirugarrenean, 11:00etatik 14:00etara. Saioak lekuz aldatu eta martxoaren 15etik 17ra izango dira Algortako Telletxe plazan, lehen aipatutako ordutegi berberetan. Argazkian, beirarako edukiontzi berdea / cc-by-sa www.larrabetzutik.org.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun