Euskal Herriko bertsolari gazteentzako Abra Saria etzi, ostiralean, jokatuko da Algortan. Algortako Bertsolari Eskolako (ALBE) antolatzaileek zabaldu dutenez, urteroko ekimen honen bidez bertso-urteari hasiera emango diote. Hitzordua Fadurako garagardotegian jarri dute, gaueko 9etan. Izan ere, iaz abiatutako ohitura berriari eutsiz, aurten ere freskuran irabaziko du sariketa, bertso-afari formatuan abestuko baitute aurtengo bertsolariek. Etxeko ordezkaria Inazio Vidal Gurrutxaga leioaztarra izango da, Asier Azpiroz bertsolari zubietarrak iaz irabazitako txapela eskualdera berriro ekartzeko ardura bizkarrean hartu duena. Berarekin batera, Arrigorriagako Txaber Ormazabal, Gabiriako Endika Igartzabal, Irati Majuelo iruindarra, Maddi Ane Txoperena hendaiarra eta Aramaioko Xabi Igoa lehiatuko dira mahaiaren inguruan. Argazkian, Imanol Uria Albizuri eta Asier Azpiroz iaz, Abra Sariko buruz-burukoan.
ALBEk zehaztu duenez, "aurretik, afaria eta ondoren, saria" izango da. Sei bertsolarien arteko nor baino nor lehia Asier Ibaibarriaga, Martin Aramendi, Mirari Azula eta Josu Arroyo epaileek baloratuko dute, txapela zeinen burura joango den erabakiko dutela. Gai-jartzailea Miren Loizaga sopeloztarra izango da.
Afarirako txartelak eskuratzeko albegetxo[abildua]gmail.com posta elektronikora idaztea edo 605 704 385 telefonora hots egitea baino ez da egin behar. Hamabost euro kostatuko du afariak.
Aurreko edizioak
Jon Sarasua, Jesus Mari Irazu, Unai Iturriaga, Igor Elortza, Estitxu Arozena pasatu ziren lehenengo urteetan Abra jaialdiaren oholtzatik. Hasiera batean udaberriko bertso-jaialdia izan bazen ere, 2002an sariketa bihurtu zuen ALBEk. Geroztik, Nerea Elustondo, Jon Martin, Xabier Paya, Ohiana Bartra, Maddalen Arzallus, Jone Uria edota Asier Azpirozek bete dute Abra sariko txapeldunen zerrenda. Euskal Herri osoko bertsolari gazteekin gauzatzen ohi dute kartela, 19 eta 22 urte bitartekoak izaten direla beti. Horrezkero, 60tik gora bertsolari gazte pasatu dira Abra Sariaren taulatik. Iazko berrikuntza, berriz, afari formatua izan zen. Aurten ere, sariketa afaldu ondoren jokatuko da.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.