Leioako kartzela izoztu egin du Espainiako Kongresuak

Erabiltzailearen aurpegia Ukberri 2012ko ots. 22a, 22:47

Espainiako Espetxe Zuzendaritzak Leioako Kukularra auzoan 2013rako eraikitzea aurreikusi zuen espetxearen proiektua alde batera utzi du Espainiako Kongresuko Barne Batzordeak, PPren oniritziarekin. Efe albiste agentziak jakinarazi duenez, Batzordeak erregimen irekian egongo liratekeen 200 pertsonentzako "gizarteratze egoitza" berriz aztertzeko eskatu du. Euzko Alderdi Jeltzaleak aurkeztu zuen proposamenean Batzordean zein Kongresuko Batzarrean eztabaidatzeko, eta besteak beste, egoitzaren kokapena ''erabat desegokia'' zela eta lursail horiek 1949tik Defentsa Ministerioarenak izatea zela hautaketa horren arrazoi bakarra arrazoitzen zuten. Era berean, Espainiako Gobernuak Leioako Udalarekin hitz egin ez duela salatu du Aitor Esteban EAJko diputatuak. PPk hasierako testuan aldaketa batzuk egin ostean aho batez onartu dute ekimena, PP, PSOE, CiU, EAJ, Amaiur, UPN eta beste taldeen babesarekin. Argazkian, zutik, Aitor Esteban diputatu jeltzalea / cc-by-sa EAJ.

Kukularrako zentroa Espetxe Azpiegituren Planaren barnean dago eta Leopoldo Barreda diputatu popular bizkaitarrak azaldu duenez, "aurreko Exekutiboaren erabaki hori" egungo Espainiako Gobernuak egiten diharduen planaren hausnarketan kokatu behar dela. Hori dela eta, espetxearen kokapena berraztertzea "merezi duela" deklaratu du. Gainera, Barredaren ustez, lekua finkatzean aurreko Gobernuak lege-distortsio administratiboan erori ahal izan zuen.

EAJk ere ez du kartzela bat eraikitzeko egokitzat jo Kukularra auzoa. Estebanek esan du aukeratutako 15.000 metro koadroko lursail hori ''konplikatua'' dela, ez dagoela bertara garraio publikoen bidez erraz iristerik, zainketa erraza ez duela, eta etorkizunean esparru horren garapena eragotziko lukeela.

PSOEko ordezkaria izan da "teknikoki" kokapenak baldintzak betetzen dituela onartu duen bakarra. Halere, proiektua berraztertzea onartu du, Gobernua egiten dabilen azpiegituren planaren baitan "logikoa" delakoan.

EAJk aurkeztutako hasierako proposamena Espainiako Kongresuko aldizkarian

Politika Leioa
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun