Euskal presoekiko elkartasun adierazpenen eta torturaren salaketaren kriminalizazioan oinarrituta Erandio, Leioa eta Itzubaltzeta / Romoko hainbat auzokide zitatuak eta “terrorismoaren goraipatzeagatik” inputatuak izan gara Espainiako Auzitegi Nazionalaren partez. Barregura urratu dezaketen zitazioak, jaiak antolatzeagatik edo kartel bat jartzeagatik hainbat lagun epaitegi berezira joan beharko gara.
Egun Euskal Herrian martxan dagoen prozesu demokratikoak aurrera egiteko beharrezkoa da euskal jendartearen eskubide zibil eta politikoak errespetatuak izatea, amaiera emanez euskal jendartearen zati handi baten ilegalizazio eta kriminalizazio estrategiari. Estatuak, momentuz, ez daude aurrerapausoak ematen, eta blokeo eta ukapen estrategian atxikituta jarraitzen dute, horregatik, oso garrantzitsua da herri bezala ereduzko erantzuna ematea, blokeo saiakera bakoitzean, estrategia hori herri harresi batekin topo egiteko aurrera egin nahi duen bakoitzean.
Guzti horrengatik, gaur, Itzubaltzeta / Romoko Santa Eugenia plazatik, 19:30ean “Eskubide zibil eta politikoen alde, utzi herriak bakean” lemapean hainbat eragile politiko, sindikal eta sozialek deitutako manifestazioan parte hartzera deitzen zaituztegu. Inputazioak salatzeko eta beraien artxibatzea eskatzeko, eskubide zibil eta politikoen errespetua exijitzeko eta jarduera politikoen legalizazioa exijitzeko
Guk gure eskubideak gauzatzen jarraituko dugu, euskal preso politikoen eskubideen urraketak salatzen, tortura salatzen, jai herrikoi, parte hartzaile eta parekideak antolatzen... Euskal Herri libre eta justu baten alde lanean jarraituko dugu. Horretarako, eskubide zibil eta politikoen eraso errepresibo hauek gelditu behar ditugu. Konbentzituta gaude, asko gara eraso hauen kontra gauden Uribe Kostako bizilagunak, horregatik salaketaren ahotsa izateko animatzen zaituztegu, gure kaleetako txoko bakoitzean, Hezkuntza zentroetan, lan eremuan... Bakoitzak gure harri-koxkorra ekartzeko eskubide zibil eta politikoen defentsan eta prozesu demokratiko honetan aktibo izateko. Gaur horretarako aukera ezin hobea daukagu... Animo!!!
Asier Izquierdo "Tximas", Beñat Vidal, Marcos Barroso eta Jose Angel Torre "Txantxel" Leioako eta Erandioko hainbat auziperatuk sinatutako artikulua
Asier Izquierdo eta Beñat Vidal: "Eskubide zibil eta politikoen alde... utzi herriak bakean!"
Garai berri baten atarian gaude Euskal Herrian. Bake eta Askatasunaren helmugara heltzeko aukerak daudela sumatzen den garaia hain zuzen; pertsona guztien eskubideak errespetatuak izango diren eszenatokia. Bai eragile ezberdinek emandako urratsak eta bai ETAren jarduera armatuaren amaierak sortu dituzten baldintzak, gatazka politikoaren konponbidea ekartzeko aukera gisa baliatu beharko genituzke. Garai berri honetan milaka lagun lanean jarri dira eta Euskal Herriak merezi duen etorkizuna lortze aldera eta haien konpromisoa berrestu dute. Zoritxarrez oraindik badaude zenbait indar aurreko eszenatokira tinko oratzen direnak, Euskal Herritarren gehiengoaren nahiaren kontra baldin bada ere. Badaude gaur egun ere antzinako eskemei eusten dieten aldeak, gure eskubide zibil eta politikoen urraketaz baliatuz Euskal gizarteari benetako bake justu baten esperantza lapurtzeko asmoz. Argazkian, auziperatuek eta hainbat auzokidek hilaren 14an emandako prentsaurrekoa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun