Egun hasierako lanuzteak %85eko erantzuna izan duela adierazi du Metro Bilbaoko greba batzordeak. ELA, CIM, UGT, LAB eta ESK sindikatuek babestuta, goizeko 5:30etik 9:30era bitartean egin dute geldialdia beharginek, lan baldintzen murrizketak salatzeko. Greba batzordearen arabera, gutxieneko zerbitzuak gainditu egin ditu garraio enpresak. Eusko Jaurlaritzaren Enplegu eta Gizarte Gaietako Sailak ezarritakoaren arabera, trenen %40k behintzat martxan behar dute, eta metroko sindikatuek uste dute gaur erdiak ibili direla. 18:00etatik 22:00etara bitartean ere lanuztea egingo dute. 19:00etan San Mamesen Athletic-Lokomotiv Mosku Europako Ligako partida hasiko da, eta Metro Bilbaoko arduradunek futbol jarraitzaileei ohartarazi diete kontuan har dezatela geldialdia egongo dela ordu horretan. Argazkian, Metro Bilbaoko langileek egindako kontzentrazioetako bat / © LAB Metro Bilbao.
Bestalde, zuzendaritzak ez du Bilboko Gizarte Arloko zazpigarren Epaitegiak plazaratutako sententzia errekurrituko, "Gara" egunkariak zabaldu duenez. Santo Tomas egunean Metro Bilbaok "greba eskubidea urratu" zuela ebatzi du epaileak. Iazko maiatzaren 25etik metroko beharginek aldi bateko hogei lanuzte eta egun osoko greba bat egin dituzte.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun