Iluntzean Alaska eta Patagonia arteko surf bira kontatuko du Kepa Acerok Sopelan
Surfaren, abenturaren eta muturreko kirolen zaleek ezin galtzeko hitzordua dute gaur iluntzeko 8:30ean Larrabasterrako Plaza Beltza herri liburutegian. Bertan, Kepa Acero surflari algortarrak pasa den abuztuaren 21a eta abenduaren 20a bitartean egindako surf bidaia azalduko du. "Azken Muga" deritzon proiektuan Alaska eta Patagonia arteko ibilbidea bakarrik egin zuen algortarrak, mundu bukaeraraino olatuen bila. Horren bidez, 2010ean burutu zuen "Bost olatu bost kontinente" proiektua oraindik harago eraman nahi zuen Acerok, muturreko egoeretara heldu eta antzinako abentura surfa berreskuratuz eta ingurumena eta jendartearekiko harremanak estutuz. Acero heldu bitartean Alaska eta Patagoniako hainbat gune oraindik surflariek ukitu gabeko kostaldeak ziren eta horietara ailegatzea bidaian zehar ikertzen joan zen algortarra. Argazkian, Kepa Acero bidaian zehar / © Kepa Acero.
Acerok azaldu duenez, "Ni surflari profesionala naiz, kirolaria; orduan, nire helburua olatuak aurkitzea da, baina, azkenean, bidaietan oso garrantzitsua da harreman pertsonalak izatea, kulturan integratzea eta esperientzia hori bizitzea. Horrek kirola beste dimentsio batera eramaten du, sakonago bihurtzen du. Horrek balio du niretzat: dimentsio osoak. Azken batean, naturarekin harreman intimoa izateko eta ingurukoekin erlazionatzeko modua da surfa. Bakarrik egoteak ere asko laguntzen du horretan".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun