1968 eta 1976 urte bitartean, Frankismo betean, apaiz talde batek Euskal Herriak jasaten zuen zapalkuntza eta errepresio basatiaren aurrean ahotsa goratzea erabaki zuen. Sermoien, idazkien, gose greben edo eta itxialdien bidez, haien herriaren eta munduaren aurrean euskal erresistentziaren ikur bihurtu ziren. Hala, bada, Espainiar Estatuak, Elizaren onespenarekin, apaiz horiek errepresioaren jomuga bihurtu zituen eta, azkenean, Zamorako apaiz-kartzelan amaitu zuten: Eliza eta Estatuaren gatibu.
Irteera sagardotegira
Bestalde, Meñakoz elkarteak Astigarragako Oyarbide sagardotegira irteera antolatu du. Txangoa martxoaren 17an izango da, larunbata, eta 11:00etan abiatuko dira Sopelatik. Hernanin poteoa egin eta gero, 14:15ak aldera Oyarbide sagardotegira helduko dira, eta bazkaldu ostean, berriro bueltatuko dira Hernanira. Gaueko 3ak aldera itzuliko dira Sopelar.
Irteeran parte hartzeko beharrezkoa izango da martxoaren 9a baino lehen ondoko kontu korronte honetan 45 euro sartzea: BBK 2095 0307 10 9104433245. Prezioaren barruan autobusa eta sagardotegia egongo dira.
Ostiral honetarako, martxoak 2, "Zamorako apaiz kartzela" (Txalaparta) liburuaren aurkezpena antolatu du Sopelan Meñakoz kultur elkarteak. Aipatu lana hainbat egilek idatzi dute: espetxe horretan Euskal Herriko hainbat apaiz preso egon ziren, tartean Nikola Telleria Sopelako bizilagun eta apaiza zena. Liburuaren aurkezpena 19:30ean hasiko da, Kurtzio Kultur Etxean. Hitzaldira Zamoran espetxeratutako hainbat apaiz hurreratuko dira: hurrenez hurren, Xabier Amuriza, Angel Zelaieta, Julen Kaltzada, Alberto Gabika eta Josu Naberan. Saioa euskaraz izango da. Argazkian, apaiza zela Xabier Amuriza bertsolaria ere preso izan zuten Zamoran / © Getxoko Kultur Etxea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun