Bilduren ustez, hipoteka-luzamendua eskatzeak “zorra berriro finantzatzea” baino ez du ekartzen. “Herritarrak zor bera izaten jarraitzen du, baina gaur ordaindu beharrean bihar ordaindu beharko du; eta horri, interesak gehitu beharko zaizkio”, kritikatu zuen Pinedok. Gainera, 2008an arau hori ezarri zutela gogorarazi zuen zinegotziak, eta bere ustez, "ez zuen arrakastarik izan, luzamendu honen azken erabilera eraginkorra aurrekontu-gaitasunaren %1-ekoa baino apur bat handiagoa izan zelako”. Beraz, Bilduk azkenean mozioaren alde bozkatu bazuen ere, aurrerago udal bilkurara gaia “modu garatuago batean” berriro eramateko aukera dagoela iragarri zuen, “arazoaren sakoneko arrazoiak kontuan hartuz”.
Berta Rodriguez PPko bozeramaileak, bere aldetik, bozketan abstenitu egin zen, bere ustez “proposamen demagogikoa” delako. “Espainiako Gobernuak kaltetuentzat konponbideak eskaintzeko borondatea duela adierazi du jada. PSOEko aurreko Gobernuak, berriz, ez zuen horrelakorik egin”.
Onartutako testuak beste eskaera batzuk egiten dizkio Espainiar Gobernuari: “proposamen arauemailea onar dezala, (...) hipotekatutako ondarean bakarrik eragina izan dezan, pertsona fisikoen kasuan eta fede oneko zordunetan”. Indarrean jarri baino lehen, “arau honen eragin juridiko eta finantzieroa egitea” proposatzen du mozioak. Arau honekin, “bahitutako ondarea gauzatu denean, gainontzeko pasiboa salbuetsirik” geratuko litzateke.
Beste eskaera batzuk
Halaber, onartutako mozioak eskaerak ere bideratzen dizkie EAEn lan egiten duten finantza-erakundeei: “utzarazpenak ekiditeko plangintzaren garapenean parte har dezatela, bitartekaritza-zerbitzuaren interbentzioa eskatzeko konpromisoa har dezatela hipotekak gauzatzeko prozedura jarraitu baino lehen, edo hasita dauden prozesuekin jarraitu baino lehen”.
Hipoteka-luzamendua ezartzea eskatu dio Sopelako Udalbatzak Espainiako Gobernuari
Otsailaren 23an Sopelako Udalbatzak onartutako urgentziazko mozioaren bitartez, tokiko Udalak hipoteka-luzamendua ezartzea eskatu dio Espainiko Gobernuari. “2008an onartutako luzamenduaren ildotik”, helburua honakoa da: “diru-sarreren jaitsiera edo lanaren galeraren eraginez, hipoteka-maileguari aurre ez egiteagatik euren etxebizitza utzi behar izan dituztenen egoerak ekiditea, betiere etxebizitza hori ohiko etxebizitza denean eta jabearen ondasun bakarra denean”. Proposamena EAJ eta PSE-EE taldeek aurkeztu zuten, eta Bildu koalizioaren babesa ere jaso zuen. Haatik, Leire Pinedo Bilduko bozeramailearentzat, aurkeztutako mozioa “ez da nahikoa”. Argazkian, Berangoko Kukullaga baserriaren desjabetze saiakeraren kontrako protesta irailaren 27an.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun