ELAren ustez EHUn proposaturiko murrizketen aurkako mozioa azkenean aurkeztu gabe geratu izanak ondo baino hobeto erakusten digu sindikatu batzuen independentziarik eza, gehiago begiratzen baitiete alderdikeriei, Euskal Unibertsitate Publikoko langileen interesei baino.
ELAren iritziz onartezina da sindikatu batzuen eta besteen jokabide interesatua. Batzuek, Patxi Lopezen murrizketak direla-eta, ez dute txintik esaten; eta EHUko errektoreordearenak, ordea, txikiagoak izan arren, guztiz gaitzesgarriak direla pentsatzen dute. Eta bestalde, beste sindikatu batzuek, Rajoy eta Lopezen murrizketak deitoragarriak direla diote, eta EHUkoak, erakunde hori zuzentzen duen aukera politikoari men eginez, erlatibizatzen dituzte, garrantzia kendu nahian.
EHUko ELAren Atal Sindikalak bere konpromisoa berresten du EHUko langileen aurrean: gure borroka kementsua eta lokabea izango da lan-baldintzen alde, eta gogoko dugun gizarte-ereduarekin bat datorren euskal unibertsitate-sistemaren alde.
EHUko ELAren Atal Sindikala
Sindikatuek eta ikasle-elkarteek azken hilabeteotan burutu izan ditugun ekimenen ondorioz EHUko errektore-taldeak atzera egin du lehenagotik proposatuak zituen murrizketa batzuetan. ELArentzat argi geratu da, berriz ere, inoiz baino beharrezkoa dugula borroka antolatua, erasoaldiari aurre egin ahal izateko. Murrizketa horietako bat ere ezin dugu onartu, ez baitute zuritzeko oinarririk. Horregatik, hain zuzen, ELAk uko egin dio EHUren neurri horien negoziazioan parte hartzeari. EHUko sindikatuek eta ikasle-elkarteek batera egin duten azken ekintza hauxe izan da: murrizketen gaineko eztabaida aparteko klaustro batera eramatea, eta murrizketen aurkako mozioa aurkeztea; Unibertsitateko arduradun nagusien erabakiak aldarazteko baliabiderik eraginkorrena izango zelakoan. Mozioaren testua ordezkaritza duten sindikatu guztien artean landu zen, eta behin adostu ondoren, klaustro-kideei helarazi zieten sindikatuek. Istorioaren amaiera komunikabideetatik ezagutu dugu azken egunotan, oso interpretazio desberdinak emanez. Argazkian, hainbat fakultate Leioa eta Erandioko campusean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun