SATSE erizaintza sindikatuak, SME Euskadiko Medikuen sindikatuak, FFHE erietxeetako medikuen federazioak, SAE erizaintza laguntzaileen sindikatuak eta UTESE osasun arloko teknikoen bilkurak lanuzteak deitu dituzte martxoaren 29rako. Aipatu egunerako greba orokor deialdia luzatu dute LAB, ELA, EILAS, EHNE eta ESK sindikatuek zein gizarte eragile ugarik. "Gobernuak onartu berri duen lan-erreforma agresiboaren aurrean protesta egiteko helburua du 24 orduko lanuzteak. Era berean, osasun sistema kudeatzeko modua eta murrizketak ere salatu nahi ditugu'', azaldu dute ohar batean osasun arloko langile erakundeek. Jarraitu dutenez, ''gastuak murrizteko Jaurlaritzak ezarri dituen politikek modu adierazgarrian ari dira eragiten osasun arretan, kalitatea murriztuz''. Argazkian, 2011ko urtarrilaren 24an, Bizkaiko Etengabeko Atentzio Guneetako (EAG) 60 bat langile egin zuten elkarretaratzea Algortako Alango kaleko anbulatorio aurrean.
Lan baldintzak ere okerrera egiten ari direla salatu dute. ''Bajak, faltak eta oporrak ez dira betetzen, lan taldeak murrizten dira eta etengabe daude kolapsatuta zerbitzuak'', salatu dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun