Interesdunek 32 hautagaitza aurkeztu dituzte guztira. Irakasle eta ikertzaile doktore iraunkorren 8 ordezkarien kasuan, 6 hautagaitza aurkeztu dituzte; doktore ez diren irakasle eta ikertzaile iraunkorren 2 ordezkarien kasuan, 2, eta gainerako irakasle eta ikertzaileen ordezkariaren kasuan, 1. Graduko ikasleen kasuan (4 ordezkari), Bizkaiko campusari dagozkion 2 ordezkari-postuak betetzeko, 3 hautagaitza aurkeztu dituzte; Arabako campusari dagokion ordezkari-postua betetzeko, hautagaitza bakarra aurkeztu dute, eta Gipuzkoako campusari dagokion postua betetzeko, berriz, 2 hautagaitza aurkeztu dituzte. Graduondoko ikasleentzat gordetako postua betetzeko, hautagaitza bakarra aurkeztu dute, eta AZPko ordezkarien 4 plazak betetzeko, 4 hautagaitza aurkeztu dituzte.
Dekano eta zuzendarien ordezkariei dagokienez, hau izan da egoera: Bizkaiko campuseko 4 ordezkarien plazak betetzeko, 2 hautagaitzaren artean hautatu ahal izan dute klaustrokideek, eta beste bi hautagaitzaren artean, Gipuzkoako campuseko bi plazak betetzeko; Arabako campuseko plazarako hautagaitza bakarra izan da. Azkenik, sailen bost ordezkarien postuak betetzeko, 4 hautagaitza aurkeztu dituzte; unibertsitateko institutuen ordezkarien plazak betetzeko, berriz, bi hautagaitza zeuden, eta Master eta Doktorego Eskolari dagokion ordezkaritza zentro berriaren zuzendariak beteko du. "Nabarmentzekoa da aurkeztutako zerrendetan sexuen arteko parekotasunaren irizpideak bete dituztela ahal izan duten neurrian", aipatu dute EHUtik.
Hauteskundeen emaitzen aurka egiteko epea amaitzean, emaitzen behin betiko jakinarazpena martxoaren 5ean egingo da.
Aldezlearen txostena
Itziar Etxebarria EHUko aldezleak, kargu hori betetzeko abenduaren 15eko Unibertsitateko Klaustroan izendatu zutenak, organo horren aurrean hitz egin du, lehen kudeaketa-txostena azaltzeko.
Erakunde berri horren arduradunaren ustez, gauzatutako lanaren balantza "positiboa izan da argi eta garbi". Lanean hasi zenetik, aldezleak esku hartzeko 27 eskaera jaso ditu; horietatik 21 dagoeneko ebatzita daude, eta gainerakoak oraindik irekita. Dagoeneko eratu dute Aholkularitza Batzordea. Haren funtzioa izango da zerbitzuaren hasierako diseinuan parte hartzea, baita erakundearen politika orokorrean parte hartzea ere. Batzordeak bederatzi kide dauzka, unibertsitateko estamentu guztietakoak (irakasle eta ikertzaileak, AZP eta ikasleak), eta campusen ordezkaritza orekatua da. Aldezlearen zerbitzuaren lehentasun dira, besteak beste, zerbitzuari buruzko informazioa hedatzea, webgunea prestatzea, erakundearen araudia egitea eta portaera egokien kode bat ezartzea (beste unibertsitate batzuetako kode etikoen antzera).
Unibertsitateko Klaustroak gaurko bileran (martxoak 1) hautatu ditu Gobernu Kontseilu berria osatuko duten kideak, 2011ko otsailaren 24tik indarrean dauden EHUko Estatutu berrien arabera osatutako lehena. Gobernu Kontseilua unibertsitateko kide anitzeko gobernu organoa da, eta bertan hartzen dira erabaki nagusiak. Estatutu berrien arabera, Gobernu Kontseilua 45 kidek osatuko dute; hortaz, lehen baino 8 kide gehiago izango ditu. Zehazki, honako hauek izango dira kideak: errektorea, lehendakari lanetan; idazkari nagusia eta gerentea; errektoreak izendatutako 8 errektoreorde; Gizarte Kontseiluko 2 kide, eta Klaustroak hautatutako beste 34 kide. 34 kide horietatik 20 Klaustroko atalek hautatuko dituzte euren kideen artetik: lotura iraunkorra duten 8 irakasle doktore; doktore ez diren 2 irakasle iraunkor; gainerako irakasle eta ikertzaileen 1 ordezkari; ikasleen 5 ordezkari (graduondoko ordezkari bat tartean) eta Administrazio eta Zerbitzuetako Langileen 4 ordezkari. Halaber, Klaustroak dekanoen eta zuzendarien 7 ordezkari hautatuko ditu, baita sailetako, institutuetako eta Master eta Doktorego Eskolako 7 ordezkariak ere. "Egitura horrek irakasleen sektoreen banaketa berria islatzen du, bi izatetik (irakasle eta ikertzaile doktore iraunkorrak, eta gainerako irakasle eta ikertzaileak) hiru izatera pasatu baitira. Gainera, graduko eta graduondoko ikasleen arteko bereizketa dakar, eta Master eta Doktorego Eskola unibertsitateko egitura berri gisa barneratzen du", adierazi dute EHUko iturriek. Argazkian, Gobernu Kontseiluko kideak aukeratzeko bozketa / © EHU.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun