Eskumaldeko LABek egindako irakurketa
Eskumaldeko LABek Txorierri, Mungialdea eta Uribe Kostako delegatuak batu ditu gaur goizean Algortan. Martxoaren 29rako deitutako greba orokorraren nondik norakoak azaltzea izan da Villamonteko kultur etxean egindako bileraren helburua. Lan erreformak izango dituen ondorioak ahaztu gabe, krisiaren eraginak mahaigaineratu ditu sindikatu abertzaleak. LABek salatu duenez, gure eskualde eta herrietan "langabezia tasa gora eta gora" doa. "Uribe Kostan urte honetako urtarrilean 10.703 langabetu zeuden", zehaztu dutenez. Hala ere, krisi egoera honen "alternatiba baduela" aldarrikatu dute. Beraien hitzetan, "egunez egun bidea egiten lortuko dugu, gure eskubideen urraketen aurrean tinko erantzunez eta demokrazian eta justizia sozialean oinarritutako herria eraikitzen. Eta bide honetan, guk geuk erabaki behar ditugu gure lan harremanak, gure babes sozialerako esparrua... Gure esku dago alternatibaren bidea hartzea". Greba orokorra "eraiki behar dugun eredu sozial berriaren bidean pauso garrantzitsu bat" izango da, LABen iritziz. Argazkian, Eskumaldeko LABeko ordezkariak gaur Villamonten.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun