Amaitu dira Bertsolari Gazteen XX. BBK Sariketako sailkapen-faseko saioak, atzo Igorren eta gaur Zallan egindako emanaldiekin. Igorren, Arratia eta Durangaldeko taldeak lehiatu ziren; gaur, Zallan, Enkarterri eta Busturialdeko bertsolari gazteak ibili dira kantuan. Durangaldeak eta Busturialdeak egin dute aurrera sailkapen-fasean, Bizkaie! agerkari digitalak zabaldu duenez. Horrenbestez, aipatu bi taldeek jokatuko dute hilaren 14ko finalaurrekoa, 11:30etik aurrera, Markinako Lea Artibai Ikastetxean. Egun bat lehenago iazko irabazle Ipar Uribe taldearekin, hau da, Algortako Bertsolari Eskolako (ALBE) neska-mutilekin lehiatu beharko du joan den asteazkenean sailkatutako Lea Artibaik, 11:30etik aurrera, Derioko Txorierri institutuan; bietatik finalera zein joango den erabakitzeko. Txapela nork janzten duen hilaren 23an erabakiko da, Bilboko Kafe Antzokian, 19:00etan hasita. Argazkian, Peru Vidal leioaztarra kantari iazko finalean / © BBK.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun