Musika talde berri bat sortzea eta aurrera ateratzea oso zaila da hainbat traba dagoelako bidean. Horri aurre egiteko, Gazte Asanblada Sopeloztarrak (GAS) alokairu gabeko entsegu lokal bat irekitzea erabaki du. Hilabete batzuk lanean egon ondoren, ostiral honetan, martxoak 16, zabalduko dute. Hitzordua 19:00etan jarri dute, Sekeko gaztetxean. Argazki erakusketa eta pintxoez gain, Chalwa Band reggae musika taldearen eta Dementzia punk rock taldearen kontzertua entzungai izango da bertan, aurreratu dutenez. Bestalde, datorren hilabetean batzar bat egingo dute entsegu lokala erabili nahi duten taldeekin, guztien artean koordinaketa eta erabilera arauak finkatzeko asmoz. Interesatu guztiek sopelakoga[abildua]gmail.com bidez jar daitezke harremanetan. Bitartean, GASek iragarri duenez, Sekeko gaztetxearen bigarren urteurreneko herri bazkarirako txartelak salgai daude jada: 8 euroren truke eskura daitezke, Plaza Beltza kulturgunean edo Sekekon bertan. Aipatu ospakizuna hilaren 31n izango da. Argazkian, Sekeko gaztetxea / © Gazte Asanblada Sopeloztarra.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun