Hilabete batzuez, euskal preso politikoen aldeko hileko azken ostiraleko elkarretaratzearen antolaketa Egin Dezagun Bidea ekimenak eraman du aurrera Algortan. Otsailaren 24an, berriz, Herrira mugimendua aurkeztu zieten Telletxe plazan bildutako gizon-emakumeei. "Preso eta iheslarien defentsan arituko den elkarte herritarra. Indar metaketa oinarri duen elkartea, edozein esparrutan eta amnistia helburu duena", azaldu zuen aipatu kontzentrazioan Algortako Herri Bilguneak. Ekimen herritarra izanik, inoiz baino garrantzitsuagoa ikusten dute guztien ekarpena: "Edozein ideia berri ongi etorria izango da", azpimarratu dutenez. Hortaz, Algortan egingo den lehenengo bilera irekira deitu dituzte herritarrak. Batzarra, bihar, asteartea, izango da, 19:00etan, Aldai patronatuan. Argazkian, elkartasunaren kriseilua / publicdomain.
"Lan asko duen elkartea da Herrira, baina ilusioarekin jaiotzen dena. Presoen eskubideen urraketak salatuko ditu elkarte berri honek, muturreko egoerei lehentasuna emanez, elkartasuna landuko du, asistentziala, juridikoa, medikoa... Iheslariak etxeratzeko ekimenak ere burutuko ditu", azaldu dute Algortako Herri Bilgunetik.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun