Algortako dendariei tabakoarekin iruzur egitea leporatu diote emakumezko bati
Getxoko Udaltzaingoak hainbat mila euroko iruzurra egitea egotzi dio Bilboko 63 urteko emakumezko bati. Aipatu laguna dendetara jo eta Kanarietako tabakoa merke saltzeko eskaintza egiten omen zien dendakoei, udal iturriek zabaldu dutenez. Eskaintza sinesgarriago egiteko tabako gorriko zenbait pakete zeraman aldean. Tratua eginda, aurrerakina eskatu ondoren ez zen berriro bueltatzen, iruzurra erabat gauzatuz. Dendari batzuk hala eskatuta Udaltzaingoak abiatutako ikerketen barruan, poliziek pasa den ostiralean, hilak 9, atzeman zuten emakumea, Algortako denda baten barruan zegoela. Kalez jantzitako agenteek “eskaintza” bertako saltzaileari egiten ziola ikusi ei zuten eta horrek dirua ematen ziola haren truke. Une horretan aldean zeraman “amua” (tabako gorriko hainbat pakete) eta kontabilitate-liburua, non dendariek beraiek nahi zuten eskaera idazten zuten. Ohar horien bitartez zenbatu ahal izan da, gutxi gorabehera, iruzurra eurotan.
Anderea topatzeko Getxoko Udaltzaingoko koordinazio zentroak Algortako dendariak ohartarazi zituen SMSak bidaliz, ustezko iruzurraren aurrean kontuz ibil zitezen, eta anderea agertzekotan berehala jakinarazteko eskatuz, herriko zenbait dendatik igaro zelako egun batzuetan. Poliziaren argiketa txostena epaitegira bidali dute eta Udaltzaingoak uste du emakume horrek beste udalerri batzuetan ere iruzur egin duela.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun