Jaurlaritzaren Gizarte Larrialdiko Laguntzetarako diruaren "laurdena" berak jarri behar izan duela dio Getxoko Udalak
Getxoko Udalak Gizarte Larrialdiko Laguntzetarako (GLL) bideratutako 579.000 euro hainbat herri-lanetan erabiltzen ari zela salatu zuen orain hiru aste Marisa Arrue PPren tokiko bozeramaileak. Gaur arte, ordea, ez du aipatutakoa gezurtatu EAJren Gobernu Taldeak. 2011n Eusko Jaurlaritzak emandako 505.920 euro gizarte larrialdietarako erabili dituztela baieztatzeaz gain, Udalak beste 173.640 euro jarri behar izan dituela zehaztu dute agintari getxoztarrek; zenbateko osoaren laurdena, alegia. “Gure helburuetako bat GLL eskatzen duten guztiak diru-laguntzarik gabe ez geratzea da, eta horregatik, beharra ez izan arren, gure aurrekontuaren parte bat horretara zuzentzen dugu, eskaera guzti-guztiei erantzuna eman ahal izateko”, adierazi du Elena Coria Gizarte Zerbitzuen zinegotziak. Guztira, 459 eskaera izan ziren 2011n. Horretaz gain, Udalak azken lau urteotan 856.777 euro zuzendu ditu Gizarte Larrialdiko Laguntzak emateko, Coriaren hitzetan. Argazkian, Elena Coria zinegotzia eta Imanol Landa alkatea Getxoko Urduña kaleko 16 zenbakian dagoeno Gizarte Zerbitzuen bulegoan / © Getxoko Udala.
Aldizkakoak ez diren laguntza horiek Eusko Jaurlaritzaren kontura dira. Udalerri bakoitzari zenbateko bat ematen dio eta udal Gizarte Zerbitzuek bideratu, gestionatu eta ordainketak gauzatzen dituzte. Getxoko kasuan, 2011n Eusko Jaurlaritzak 505.920 euro eman zituen eta Udalak 173.640 euro, banatutako (679.560 euro) zenbateko osoaren %25a, udal iturrien arabera. Gizarte Larrialdiko Laguntzak, diruz laguntzeko xedearekin, ohiko edo ezohiko izaerarekin gastu zehatzei aurre egiteko baliabide gutxi dituzten pertsonentzat dira, gizarte bazterkeriako egoerei aurrea hartze edo gutxitze aldera. "Diru-laguntza horiek Getxoko Udaleko Gizarte Zerbitzuek dituzten helburu estrategikoetan kokatzen dira, hain zuzen ere, bazterkeriako egoerak prebenitzean eta artatzean datza hori eta baita pertsonen, familien eta taldeen integrazio soziala bultzatzean ere", azaldu dutenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun