Espainiako Gobernuak onartutako lan erreforma "lotsagarria" dela salatzeko, Getxoko PPren egoitzaren aurrean egingo du kontzentrazioa bihar Eskumaldeko ELA sindikatuak. Hitzordua 16:30etik 17:00etara arte jarri du aipatu langile erakundeak, Areetako Zugatzarte Etorbideko 8. zenbakian. Jakina denez, martxoaren 29rako greba orokorra deitu dute Hego Euskal Herrian LAB, ELA, EILAS, EHNE eta ESK sindikatuek zein gizarte eragile ugarik. Euskal Herriko CNTk ere bat egin du horrekin. CCOO eta UGT sindikatuek, berriz, Espainiako Estatuan deitu dituzte lanuzteak egun horretarako. Argazkian, Erandioko udaletxe aurrean egin zuten elkarretaratzea otsailaren 1ean Eskumaldeko ELAko 200 bat ordezkarik, murrizketen kontrako manifestaziora deitzeko.
Arlo zehatz batzuetako langileak ere batu dira martxoaren 29ko greba orokorrera: SATSE erizaintza sindikatuak, SME Euskadiko Medikuen sindikatuak, FFHE erietxeetako medikuen federazioak, SAE erizaintza laguntzaileen sindikatuak eta UTESE osasun arloko teknikoen bilkurak lanuzteak egingo dituzte egun horretan. Bestalde, "Murrizketarik ez. Inposiziorik ez" lelopean, hilaren 27an Bilbon manifestazioa egitea erabaki dute ErNE, ELA, ESAN, SIPE eta EUSPEL Ertzaintzaren sindikatuek. Halaber, 29an Erandioko ertzain-hirian egingo dute itxialdia langile erakundeetako ordezkariek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun