Demokrazia Hiru Milioi (D3M) hautesle plataformarekin eta Askatasuna alderdi politikoarekin lotutako hamahiru lagunen kontrako epaiketa salatzeko, larunbat honetan, hilak 17, prentsaurreko jendetsua izango da, Bilboko Branka agerkari digitalak aurreratu duenez. Hitzordua 12:00etan jarri dute Arriaga plazan, “Epaiketa politikorik, ez!” lemapean. Epaiketa apirilaren 30ean hasiko da eta, besteak beste, auziperatuen artean dira Iker Rodrigo lutxanarra, Eli Zubiaga algortarra eta Arantza Urkaregi Leioa eta Erandioko campuseko irakasle bilbotarra. 2009ko irailean auzipetu zituen Baltasar Garzon Espainiako Auzitegi Nazionaleko epaileak, "ETAko kide izatea edo erakunde armatua laguntzea" egotzita. Urte hartako martxoan D3Mk eta Askatasunak Eusko Legebiltzarrerako hauteskundeetara aurkeztu nahi izan zuten, baina Auzitegi Gorenak baliogabe utzi zituen, Batasuna legez kanpoko alderdiarekin harremana zutelakoan. Fiskalak 9 urteko espetxe zigorra eskatzen du Rodrigo, Zubiaga eta Urkaregirentzat. Argazkian, orduko atxiloketak salatzeko manifestazioa Algortan.
Iker Rodrigo, Eli Zubiaga, Arantza Urkaregi eta beste bost herritar 2009ko urtarrilaren 23an atxilotu zituen Espainiako Poliziak, D3Mren aurkako operazioan. Zortziak 2010eko martxoaren bukaeran atera ziren kartzelatik.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun