Zentro berria Bizkaiko Foru Aldundiko Gizarte Ekintza Sailarekin itunduta dago. Adimen-urritasuna duten ehun pertsona har ditzake. "Horrela, eskualdean zegoen gizarte-eskaria arinduko du", aipatu dutenez. Zerbitzu okupazionala honela definitzen da: ezgaitasuna duten pertsonek gizarte-bizitzan modu aktiboan parte hartzea bultzatzera bideratutako jarduerak eta baliabideak, lan-, gizarte- eta prestakuntza / hezkuntza-jardueraren inguruan kokatzen diren garapen pertsonaleko programen bitartez. Horren helburua da pertsona erabiltzaileen garapena bultzatzea, autonomia pertsonala, autodeterminazioa eta gizarte-balorazio eta funtzionalitate handiagoa sustatuz, euren bizi-kalitatea hobetze aldera.
Zehazki, Getxoko zentroak balio erantsi handiko jarduerak hartzen ditu industriarako, elektronikarako, kableatzeetarako, muntatze elektrikoetarako eta eragiketa logistikoetarako, eta eremu berri bat hartzen du, adimen-urritasuna duten pertsonen parte-hartze komunitario handiagoa bultzatzeko udalerriko bizitzan.
Agiriak kudeatzeko bikaintasun-zentroa
Dokudea-ren (www.dokudea.com) xedea da erreferentzia teknologikoa izatea agiriak kudeatzeko sektorean, eta neurrira eginiko zerbitzu profesionala eskaintzen du. Zerbitzu horretan, hauek sartzen dira: aholkularitza, on-line euskarri informatikoa, agiriak jasotzea, digitalizatzea eta zaintza eta suntsitze konfidentziala, ekologikoa eta ziurtatuta. Prozesuak kontrol zorrotza izango du, eta balio erantsi argia eta erabateko segurtasuna eskaintzen ditu. Horri guztiari izaera berritzaileko beste zerbitzu osagarri batzuk gehitu behar zaizkio, teknologia berriei eta administrazio digitalari lotutakoak.
Proiektu globalak 5,5 milioi euroko inbertsio ekonomikoa eragin du (azpiegitura, instalazioak eta ekipamenduak), eta ondoko hauen finantza-laguntza dauka: Bizkaiko Foru Aldundia (1.400.000 euro), BBK-ko Gizarte Ekintza (1.000.000 euro) eta Lanbide (721.000 euro).
Lantegi Batuetara bisita (Bizkaiko Foru Aldundia)
Lantegi Batuak Fundazioak Getxon dituen instalazio berriak bisitatu ditu gaur Jose Luis Bilbao Bizkaiko ahaldun nagusiak. Ezgaitasuna duten pertsonentzako lan-aukerak sortzea xede duen erakundeak agiriak kudeatzeko bikaintasun-zentroa jarri du tokiko Udalak lagatako orubean. "Proiektu horrek balio erantsidun soluzioak jarri ditu enpresen eta erakundeen eskura, agiriak eta artxiboak kudeatzeko", foru iturriek zehaztu dutenez. Zentroak 31 lanpostu sortu ditu, horietako 22 ezgaitasunen bat duten pertsonentzat. Dokudea zein zerbitzu okupazional berria Lantegi Batuen zentro berrian kokatzen dira. Gaurko bisitaren harira, Imanol Landa alkateak aipatu zentroa bigarrenez aurkeztu behar zuela salatu zuen atzo Getxoko PPk. Marisa Arruek aipatu zuenez, "2011ko martxoaren 18an aurkeztu zuten hedabideen aurrean, kasualitatez, hauteskunde kanpainarekin bat eginez". Argazkian, Bilbao eta Landa gaurko bisitan / © Bizkaiko Foru Aldundia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun