Agerraldi horretan, "orain arte ezagutu dugun metro sistema suntsitu" nahi izatea leporatu zion Metro Bilbaoko zuzendaritzari greba batzordeak. ELA, LAB, CIM, UGT eta ESK sindikatuen iritziz, "modu interesatuan" murrizten ari da zuzendaritza tren eta geltokietako zerbitzua. "Gero eta tren gutxiago dabil, ez da errefortzurik jartzen partida, manifestazio eta ekitaldi berezietarako, geltoki askotan ez da inor aritzen asteburuetan eta gero eta jende gutxiago jartzen ari dira zerbitzua emateko. Bizkaitarrok orain arte izan dugun metro-sistema suntsitu nahi dute, orain artekoa behin betiko amaitzeko modua lantzen ari dira, eta horretarako absentismoa bezalako aitzakia merkeak bilatzen dituzte", salatu zutenez. Gauzak horrela, egoera salatu zein langileekin elkartasuna agertu nahi dutenei gonbita egin diete martxoaren 24rako Bilbon deitu duten manifestaziora joateko. 17:30ean abiatuko da, Plaza Eliptikotik.
Epaiketa bihar
Bitartean, bihar, goizeko 9:30ean izango da zuzendaritzak lantaldea osatzeko moduari buruz jarri duen demanda aztertzeko epaiketa Bilbon. "Zuzendaritzak erabat 'sálvame de luxe' estiloan antolatu duen epaiketa horretan auziaren bost puntuetako bakarra soilik ebatziko da. Horregatik, greba batzordeak argi utzi nahi du emaitza dena delarik ere ez duela konponbidea ekarriko. Irtenbidea hitzarmen kolektiboa eta barruko araudia zorrozki betetzetik etorriko da", adierazi dute sindikatuek.
Metro Bilbaoko greba batzordeak lau orduko greba deitu du gaur arratsalderako, duela urtebete baino gehiago garraio enpresaren zuzendaritzarekin duen lan gatazkaren baitan. Lanuztea 18:30etik 22:30era izango da, hau da, bat etorriko da Athletic Clubek San Mamesen Manchester Uniteden aurka jokatuko duen partidaren hasierarekin (19:00) eta amaierarekin. Metro Bilbaok ez du zerbitzu berezirik eskainiko. Izan ere, hilabete hasieran iragarri zuten arduradunek "oraingoz ezin izango dituztela eskainiko, langileen artean jasotzen ari den absentismo handiaren ondorioz". ELA, LAB, CIM, UGT eta ESK sindikatuak, ordea, ez datoz bat horrekin. Zuzendaritzak bere “ezintasunak” langileei leporatzen dizkiela salatu zuten, asteartean Ansioko metro geltokian egindako prentsaurrekoan. Langileen ordezkarien hitzetan, “adierazpenen bidez sua biziagotzen ari dira eta horrek tentsio handiko egoerak eragin ditu geltokietan”. Hori dela eta, “gezurrak esateari eta prentsan filtrazioak egiteari uzteko eta Metro Bilbao osatzen dugun langile guztien profesionaltasunaren alde egiteko” eskatu zioten zuzendaritzari. Argazkian, Metro Bilbaoko langileak asteartean Ansion / © LAB Metro Bilbao.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun