Gazte Martxa Algorta eta Getxon ibilaldia eginez aurkeztuko dute larunbat honetan, martxoak 24, tokiko gazte independentistek. Jalgi Hadi Garaipenera dinamikaren bat eginez, eguerdiko 12etan abiatuko da Telletxetik Algortako Martxa; 13:00ak aldera, mokadua Arrigunagan hartzeko. Ordu erdi beranduago, 36ko gerrako gudariei omenaldia egingo diete Galeako fortean. Egitarauarekin jarraituz, 14:00etarako aurreikusita daukate Txorimalo gaztetxera heltzea: bertan argazki erraldoia egin eta, ondoren, bazkaria (4 euro) izango dute neska-mutilek. Bazkaloste girotuaren ostean, berriz, Gazte Martxaren aurkezpen ekitaldia egingo dute, 20:30ean. Azkenik, 21:00etatik aurrera, Garrasika, Kruders eta Su Ta Ke taldeak arituko dira kontzertuan (3 euro). Hala ere, aurreko egunetan ere izango dira ekitaldiak. Gaur, astelehena, "Haizea eta sustraia" dokumentala eskainiko dute, 17:00etatik aurrera, Eztabaida gune antiautoritarioan. Asteazkenean, berriz, "Ezkutua eskura" solasaldia izango da toki berean, 19:00etan hasita. Argazkian, gazteak eskualdean barrena, UK Martxa bateko artxiboko irudian.
Jalgi Hadi Garaipenera dinamikaren baitan, iristear da aurtengo Gazte Martxa. Testuinguru berezian gainera, nafar konkistaren 500. urteurrena baita aurten. Hori ahaztu gabe, apirilaren 6tik 7ra Saratik Lesakarako bidea egingo dute Euskal Herriko hainbat gaztek, "herri honen aldarrikapenak ahoz aho, eskuz esku eta pausuz pausu zabalduz". Apirilaren 8an, berriz, Iruñean izango dira, Aberri Egunean. Uribe Kosta aldera etorriz, Gazta Martxaren inguruko ekimen ugari izango dira egunotan. Adibide bezala, Algortako gazte independentistek antolatutakoak. Aipatu jarduera guztietan egongo dira salgai Gazte Martxarako bonoak eta autobuserako txartelak. Hain zuzen ere, larunbateko kontzertuetan ateratako dirua Sarara joateko garraioa merkatzeko erabiliko dute. 24ko ospakizunerako egun osoko bonoari (5 euro) dagokionez, Algortako Martxa egin artean egongo da salgai.
Algorta eta Getxoko ekitaldiak
Martxoak 19, astelehena
17:00 "Haizea eta sustraia" dokumentala, Eztabaidan.
Martxoak 24, larunbata
12:00 Algortako Martxaren hasiera, Telletxen. Ibilbidea: Telletxe, Fadura, Algorta, Arrigunaga, Txorimalo.
13:30 36ko gerrako gudariei omenaldia, Galeako fortean.
14:00 Txorimalora heldu eta argazki erraldoia. Ondoren bazkaria (4 euro) eta bazkaloste girotua.
20:30 Gazte Martxaren aurkezpen ekitaldia.
21:00 Kontzertuak (3 euro): Garrasika, Kruders eta Su Ta Ke.
Kontzertuetan ateratako dirua Sarara joateko autobusak merkatzeko erabiliko da.
24rako egun osoko bonoa (5 euro), goizeko martxan zehar salgai.
Algortako gazte independentistek antolatutakoak.
Ekimen guztietan egongo dira salgai Gazte Martxarako bonoak eta autobuserako txartelak.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Gazte Martxa Algorta eta Getxon ibilaldia eginez aurkeztuko dute larunbat honetan, martxoak 24, tokiko gazte independentistek. 