Gazte Martxa kanpaldia eginez aurkeztuko dute Leioako campusean

Eskualdeko hainbat herritan bezala, EHUren Leioa eta Erandioko campusean ere jarduera ezberdinak antolatu dituzte, Gazte Martxaren berri emateko asmoz. "Ikasleoi ere ekimen horietan parte hartzea dagokigu, herri honen iragana ezagutuz etorkizuna marraztu dezagun", azaldu dute sustatzaileek. Gauzak horrela, asteazken honetan, martxoak 21, "Ezkutua eskura" Nafarroako konkistaren 500. urteurrenaren inguruko hitzaldia izango dute, Jalgi Hadi Garaipenera dinamikaren baitan. Hitzordua 12:00etan jarri dute, Gizarte Zientzietako 7. gelan. Jarraian, kanpaldia egingo dugu campusean bertan, Gazte Martxarako "motorrak berotzen" joateko. Ostegunean berriz, parrandarako aukera izango da Bilbon. Hala ere, bertara abiatu aurretik gosari herrikoia egingo dute, 08:30ak aldera; eta ondoren, kanpin dendak jasoko dituzte. Argazkian, 2011ko martxoaren 15ean, eguerdian, 30 bat ikaslek baraualdiari ekin zioten Leioa eta Erandioko campusean, "euskal gazteriaren aurkako jazarpena" salatzeko / cc-by-nc Topatu.info