Santiago Pedraz Espainiako Auzitegi Nazionaleko epailearen aurrean deklaratzeari uko egin diote gaur Irantzu Gallastegi preso politiko berangoztarrak eta bere bikotekide Xabier Garcia Gaztelu "Txapote" galdakoztarrak. 1997ko urtarrilaren 30ean, Donostian, Eugenio Olaziregi bizikleta denda bateko langilearen hilketan parte hartzea leporatzen diete biei. Europa Press albiste agentziak zabaldutakoaren arabera, "Herri Batasunaren inguruak bere garaian justifikatu zuenez, aipatu dendariak ohartarazi zuen Ertzaintza, Valentin Lasarte atxilo zezan". Jesus Alonso fiskalak eskatu zuen ikerketa berriro zabaltzea, polizia iturriek diotenez, Javier Gomez Elosegui espetxeko psikologoa hiltzeko pistola berbera erabili zutelako Olaziregiren aurka. Eloseguiren ustezko hiltzaile Fernando Elejaldek deklaratu omen zuen arma Gallastegik eta Garcia Gazteluk eman ziotela. Gaur, ordea, hori gezurtatu du Elejaldek, deklarazio horiek torturen eraginpean egin zituela esanez. Argazkian, presoen aldeko ekimena Berangon.
Irantzu Gallastegik 1994ko azaroan ihes egin zuen, ETAren Bizkaia komandoko ustezko hainbat kide atxilotu zituztenen garaian, eta 1999ko martxoaren 9an atxilotu zuen Frantziako Poliziak, Parisen, ETAko kide izatea egotzita. Geroago, aldi baterako Espainiako Justiziaren esku utzi zuen Frantziakoak berangoztarra, Espainiako Auzitegi Nazionalean epaiketa egiteko. 2003an, berriz ere Frantziara eraman zuten, gelditzen zitzaion espetxe zigorra han betetzeko. Zigor hura osorik bete ostean 2005eko ekainaren 14an estraditatu zuten. Espainiako Justiziak, besteak beste, 1993 eta 1999 bitartean, Bizkaia eta Donostia komandoetan aritu izana eta Fernando Mugica Herzog abokatua eta Miguel Angel Blanco Ermuko zinegotzi popularraren heriotzetan parte hartu izana leporatzen dizkio. Azken hori egotzita, 50 urteko espetxe zigorra jarri zioten berangoztarrari, 2006ko uztaila hasieran. Jose Ignacio Iruretagoyena Zarauzko PPko zinegotziaren hilketa leporatuta, berriz, 46 urteko kartzela zigorra jarri zioten 2009ko bukaeran. Egun, Almerian preso daukate.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun