Igande honetan, martxoak 25, izango da Sopelako Herri Krosaren hamargarren edizioa. Munarri Atletismo Taldea da lasterketaren antolatzailea eta Sopelako Udalaren laguntza ere badauka. Aurreko urteetan legez, parte-hartze handia espero dute antolatzaileek; mila korrikalari baino gehiago, hain zuzen ere. Erdia umeen kategorian eta beste erdia federatuen kategorian. Goizeko 10:30ean prebenjaminak hasiko dira, eta 11:30ak arte, hamar minutuko tarteetan, beste kategorietako atletak abiatuko dira: benjaminak, kimuak, haurrak, gazteak, kadeteak eta seniorrak. Horrenbestez, ostegun honetara arte egongo da zabalik izena emateko epea ondoko lekuetan: Sopelako Kurtzio Kultur Etxea (Mendieta 11), 18:00etatik 20:00etara; Algortako Kantxa Kirol Moda (Torrene 4); eta Bilboko Bikila Kirolak (Euskalduna 7). Munarri elkartearen helbide elektronikoaren (munarriat[abildua]hispavista.com) bidez, ordea, ostiralera arte egongo da aukera. Argazkian, duatloia ere egin ohi dute Sopelan, oraingo honetan Hirubi Triatloi Elkarteak antolatuta / © Sopelako Udala.
Bosgarren ediziotik aurrera, herri krosa Zaldu inguruan egin da, Sopelako herri-gunean trafiko arazoak ez sortzeko helburuarekin. Helmuga, baina, Sabino Arana kalea izango da, haurren lasterketetan gertatzen den bezala. Munarri Atletismo Taldeko lagunek lasterketarekin kolaboratzen dutenei eskerrak eman dizkiete: Sopelako Udala, BBK, Kantxa Kirol Moda eta herriko saltokiak. "Haiek barik ezinezkoa izango litzateke lasterketa aurrera eramatea", adierazi dutenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun