Iñaki Goirizelaia EHUko errektoreak bilera bat eskatu dio Angel Yuste Espetxeetarako Zuzendaritzako idazkari nagusiari, Espainiako kartzeletan dauden euskal presoek unibertsitatean ikasketak egin ahal izateko akordio bat lortzeko helburuarekin. Isabel Celaa Hezkuntza, Unibertsitate eta Ikerketa sailburuak eman zuen horren berri joan den ostiraleko Eusko Legebiltzarreko kontrol saion, Juanjo Agirrezabala EAko legebiltzarkideak egindako interpelazioari erantzunez, Europa Press albiste agentziak zabaldu duenez. Espainiako Auzitegi Konstituzionalak EHUri unibertsitate gisa duen autonomia aitortu zion iaz, eta, irakaskuntza, ikaskuntza eta ikerkuntza garatzeko beharrezko duen askatasunaren izenean, ikasketak nola kudeatu erabakitzeko ahalmena duela ebatzi zuen. Ondorioz, euskal presoek EHUn ikasteko aukera dute berriz, nahiz eta, praktikan, Espainiako Estatutik kanpoko kartzeletan daudenei soilik eragiten dien erabakiak. Espainiako kartzeletan daudenek ikasketak egin ahal izateko, beharrezkoa da Espetxeetarako Zuzendaritzarekin akordio bat egitea, eta, hark orain arte uko egin dio EHUrekin hitzarmenik egiteari. Argazkian, 2009ko abenduaren 16an, euskal presoek EHUn ikasteko eskubidea dutela aldarrikatu zuten Leioa eta Erandioko campusean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun