Ehizari buruzko 2011ko martxoaren 17ko 2/2011 Legean jasotzen dira segurtasun-eremuen nondik norakoak. Horren arabera, esparruok zera dira: pertsonak eta haien ondasunak babesteko neurriak behar dituzten lurrak. Segurtasun-eremuetan debekatuta dago armekin ehizatzea, salbu Bizkaiko Foru Aldundiak onartzen dituen eta dagoeneko ezarrita dauden ehiza-postu finkoetan. Ez da hau, ordea kasua. Dena dela, ezin da, oro har, segurtasun-eremuetarantz tirorik egin.
2008ko azaroan inauguratu zuten Arboretuma, eta 14 hektarea hartzen ditu, guztira, EHUren Leioa eta Erandioko campusean. Dena dela, zenbait aldetan banaturik dago eta 3 kilometroko errepide eta bide-sare batek lotzen ditu aldeok. Leioa, Erandio eta unibertsitatearen beraren instalazioak ditu mugakide, eta hainbat erabilera ditu: publikoa, zientifikoa eta akademikoa. Guztira, 130 barietatetako 1.700 zuhaitz daude Arboretumaren hiru guneetan; baita 600 zuhaixka, azalea sailak, errododendroak eta arrosa landareak ere. Gainera, herritar guztiek dute sarbidea. Hala, Arboretum “Autoktonoa” deritzonak, esaterako, EAEko habitat naturalak jasotzen ditu. "Asia eta Ekialdea” deritzona, berriz, gurearen antzeko klima duten beste lurralde batzuetako espezieak biltzen ditu. Eta, azkenik, "Produktiboa" delakoan, egurra egiteko zein janaritarako espezieak daude.
Lankidetza hitzarmena
Gunearen egonkortasuna eta heldutasuna bere horretan iraunarazteko asmoz egin zuen Bizkaiko Foru Aldundiko Nekazaritza Sailak lankidetza-hitzarmena eta, horri esker, beste zenbait hobekuntza ere etorri zaizkio: hobetu egin dira hango zelaiak, azpiegitura-lanak egin dira (urak biltzeko sistema, kutxatilak, ureztatze sistemaren ikuskapena, arekak…) eta, gainera, lehen zuen baino balio handiagoa eman diote han askatu dituzten animaliek. "Merezi du aipatzea Bizkaiko Fauna Basatia Sendatzeko Zentroan jaso eta oneratutako animaliak izan direla, hau da, Bizkaiko Foru Aldundiaren Gorlizko zentroan sendatutakoak, gaineratu dute foru arduradunek.
Irene Pardo Nekazaritza diputatuaren hitzetan, "Mundua gero eta hiritarragoa dugun gariotan, zuhaitzek beste betekizun bat izan behar dute hirietan, eta horrexegatik jarraitzen dugu zuhaitzei merezi duten kudeaketa eta babesa ematen". “Gerriko berde” esaten zaien horiek "zeregin garrantzitsua dute animalien habitat gisa, eta Arboretuma laborategi bizidun moduko bat da, ingurumen oso baliagarria. Horrez gainera, hiriko biztanleen eta basoen artean dagoen arrakala murrizten laguntzen du”, amaitu duenez.
Euskal Herriko Unibertsitatearen eskaera bat dela medio, Leioa eta Erandioko campuseko Arboretum gunea "segurtasun esparru" izendatzea proposatu du Bizkaiko Foru Aldundiko Nekazaritza Sailak. Bi erakundeek lankidetza-hitzarmena izenpetu zuten, gune hori kudeatu eta kontserbatzeko; baita hezkuntzan zein aisialdian erabiltzeko eta paisaia zaintzeko ere. Foru erakundeak egin duen proposamenaren arabera, Arboretuma "blindatu" egingo da, eta ezingo da han barruan ehizatu, ezta kanpotik tirorik egin ere. Proposatzen den segurtasun-eremuari dagokionez, Ehiza eta Ibaietako Arrantza Atala eta EHU bera ados daude haren mugekin, hau da, aipatu eremua eta unibertsitateko eraikinak eta errepideak mugen barruan sartzearekin. Hala, bada, laster izendatuko dute segurtasun-eremu, Nekazaritzako diputatuaren foru agindu bidez. Argazkian, Irene Pardo Nekazaritzako foru diputatua eta Carmelo Garitaonandia EHUko erretoreordea hegaztiak askatzen, artxiboko irudian / © EHU.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun