Ibilgailuetako "leiho apurtzailearen" inguruko informazioa "mugatzea" egotzi dio Getxoko PPk EAJri
Azken hilabeteetan ibilgailu ugari agertu da leihoak apurtuta Getxo udalerrian. Hori dela eta, argibideak emateko asmoz, atzoko Presidentetza batzordera Udaltzaingoaren nagusia agertzea eskatu zuen Marisa Arrue tokiko popularren bozeramaileak. Polizien burua, ordea, ez zen agertu. Hori dela, "ohi bezala eta, bereziki, auzokideen artean alarma piztu duen kasu hauetan, alderdi politikoei ematen dien informazioa mugatzea" egotzi dio Getxoko PPk EAJri. Arrueren hitzetan, "arduradun nagusia bera dela eta galderei erantzutea berari dagokiola izan zen Herri Babes zinegotziak eman zigun erantzun bakarra". "Leiho apurtzaile" ezizenez ezaguna, otsailaren 10tik 22ra bitartean, 47 auto kaltetu zituen ezezagun batek, Arruek berak emandako datuen arabera. Martxoaren 11n, berriz, besoan zauria zeukan 21 urteko gizonezko bat atxilotu zuten Areetan. Mutilak eraso egin zutela esan arren, auto bateko kristala apurtzen saiatzean zauritu zela dio Udaltzaingoak. Hala ere, bi ibilgailu kaltetzea baino ez diote leporatzen, "berak aitortutakoan oinarrituta". Beste auzi guztiak artxibatu egin dituzte, "frogarik ez dagoelako".
Marisa Arrue Getxoko PPren bozeramaileak gaineratu duenez, Itzubaltzeta / Romo, Algorta, Areeta, Santa Ana eta, orain gutxi, Negurik antzeko gertaerak izan direla aitortu zien Herri Babeserako zinegotziak. "Hala ere, EAJk baieztatu digu ez duela datu gehiagorik plazaratuko eta, oso pozik daudela, ustezko egilea zauriturik dagoelako eta denbora batez ez duelako horrelakorik egingo", adierazi du ordezkari popularrak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun