Udal aurrekontuak lantzeko parte-hartze prosezua "fartsatzat" jo du Sopelako PSE-EEk
Sopelako udal aurrekontuak onartzeko akordio batera heldu ostean, "EAJren proposamen guztiak beregain hartzea" egotzi dio Saioa Villanueva Bilduko alkateari Sopelako PSE-EEk. Horiek lantzeko burututako herritarren parte-hartze prozesua, berriz, "fartsatzat" jo du Maria Teresa Fernandez tokiko sozialisten bozeramaileak, bere iritziz, "bi alderdiek adostu dutelako adostu beharreko guztia". "Non gelditu da sopeloztarren iritziarekiko gardentasuna eta errespetua?" galdetu dio bere buruari zinegotzi konstituzionalistak; ondoren, "EAJren programa hartu izana" leporatzeko Bilduri. Fernandesen arabera, koalizio ezkertiar eta jeltzaleen arteko "azken orduko akordio baten emaitza" dira onartutako aurrekontuak. Are gehiago, herritarrei egindako kontsulta "alferrikako lana eta engainua" izan dela aipatu du PSE-EEkoak. EAJri, berriz, Udala Bilduren esku dagoela, koalizioari egindako kritikak "ahaztea" egotzi dio Fernandezek, "langabeziari aurre egin eta merkataritza suspertuko ez duten aurrekontuak babestu dituelako". Argazkian, udal zinegotziak otsaileko osoko bilkuran / © Sopelako Udala.
"EAJren programa garatu beharko dute Bilduk eta bere alkateak, ez berea", adierazi du Maria Teresa Fernandez Sopelako PSE-EEko bozeramaileak. Bere hitzetan, ezkertiarren proposamenen artean ez zegoen Sopela erdigunea oinezkoentzat jartzeko egitasmoa. "Herritarrei zabaldutako galdetegian ere ez zegoen", gaineratu duenez. Hala ere, Udalak argi eta garbi azaldu zuen alderdi biek udalerriarentzat "estrategikoak diren hainbat diru-partida" bideratzea adostuz lortu dutela aurrekontuak aurrera ateratzea. Hainbat proiektu, berriz, "auzokideek eskatutakoaren arabera" aintzat hartu dituzte: Sopelmarreko biribilgunea, Arrietarako umeentzako ekipamenduak eta skate-park berria, besteak beste. Josu Landaluze EAJko bozeramaileak berak "zalantzan" jarri ditu diru partida batzuk: Sopelbus zerbitzua urte osoan zehar mantentzea, edo inbertsio eta kultura sailen artean dagoen “desfasea”, besteak beste. “Kulturan bi milioi eurotako aurrekontua dugu, eta inbertsioetan 1,8 milioi. Kultura eta euskara ezinbestekoak eta oso garrantzitsuak dira, baina sail bien artean desfase handia dago”, adierazi zuen jelkideak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun