ELA, LAB, ESK, STEE-EILAS, EHNE, HIRU eta CGT sindikatuek uste dute datorren martxoaren 29an lan-erreformaren kontra egingo duten greba orokorra "arrakastatsua" izango dela, 900 enpresa batzorderen babesa jaso baitute dagoeneko, Donostian emandako prentsaurreko batean azaldu dutenez. Gainera, sektore publikotik ere babes "asko" iritsi zaizkiela azpimarratu dute. Era berean, Eusko Jaurlaritzak ezarritako zerbitzu minimoen kontrako helegitea iragarri dute, "gehiegizkoak" deritzetelako. Gaur jakinarazi du Gasteizko Gobernuak zeintzuk izango diren greba orokor deialdian bete beharreko gutxieneko zerbitzuak. Jaurlaritzak adierazi duenez, garraio publikoek %30eko gutxieneko zerbitzuak bete beharko dituzte. Bestalde, ospitaleek, larrialdi zerbitzuek, energia hornitzaileek eta bidesariek jaiegunetan bezala lan egin beharko dute. Argazkian, Eskumaldeko LABen gaurko elkarretaratzea Lanbideko Areetako bulegoen aurrean.
Ospitale geriatriko eta eguneko zentroetan lantaldearen erdia mantendu beharko da. Gasolindegien %30ek ere irekita egon beharko dute. Hilerriek eta justizia administrazioak nahitaezko zerbitzuak bakarrik eskainiko dituzte. Ikastetxe eta unibertsitateetan zuzendaritzako kide bat eta atezainak egotea derrigorrezko izango da. Komunikabideei dagokienez, EITBk albistegiak eman beharko ditu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun