Jon Rosales urtarrilaren 12an atera zen Alcala Mecotik, 10.000 euroko fidantza ordaindu ostean. Gaztea 2011ko irailaren 19tik 22ra epaitu zuten Espainiako Auzitegi Nazionalean, Uribe Kostako beste hamar mutilekin batera, kale borroka taldea osatu eta 2004tik 2007ko uztailera bitarteko hamar ekintza inguru leporatuta. Josu Rodriguez eta Mikel de Gregorio gazte algortarrak izan ezik, gainontzekoak absolbitu egin zituzten. Tartean, ia bi urte egin zituen espetxean Rosalesek, 2010eko otsailaren 17an atxilotu baitzuten Katalunian. "Jon basatiki torturatu egin zuten, salaketa jarri zuten, abokatuek ere jasandako torturak ikaragarriak zirela adierazi zuten, Madrileko epaitegian ere berretsi egin zuen tortura salaketa… baina orain arte tribunalek ez dute ezer egin tortura kasu honetan", salatu zuen Amnistiaren Aldeko Mugimenduak.
Jon Rosalesi ongi etorria irudietan
Jon Rosalesi ongi etorria eginez, herrian "bat gehiago" direla ospatu dute Algortan
"Algortan bat gehiago" leloari helduz, 230 lagun inguruk ongietorria egin zioten atzo Jon Rosales preso ohiari. Hala ere, herrian "beste 19 gura ditugula" argi utzi zuen tokiko Herrirak. Bi ertzainen zaintzapean, ekitaldiaren berotasuna areagotu zuen Tellagorri plazako txikitasunak. Behin txapela jantzita, lagunek eskainitako agur dantzak, kartzela-kide izandako Jose Camacho hernaniarraren gutunak, Etxeraten izenean Arkaitz Goikoetxea presoaren amaren eskutik jasotako opari eta besarkadak... piztu zuten Rosalesen irribarrea. Ohi bezala, aurretik espetxetik irtendako azken algortarrak, kaso honetan Aitor Artetxek, eman zion askatasunaren giltza. Bertan bildutako guztiek, berriz, bertsoak abestu zizkioten, antolatzaileek banatutako paperak eskuan. Bitartean, euskal preso eta iheslari politikoak etxeratzeko "guztion indarra beharrezkoa" dela aldarrikatu zuen Algortako Herrirak. Hori horrela, "lanera" deitu zituzten algortar guztiak, asteazkenero batzarra (19:00etan Aldai patronatuan) egiten dutela gogoratuz. Behin ekitaldia bukatuta, poteoa eta afaria izan ziren, gaueko ordu txikietara arte. Argazkian, Rosales giltza eta txapela eskuan / publicdomain.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun