Eskola-elkarbizitzarako II. Jardunaldia hartuko du ostiral honetan, martxoak 30, Kultur Leioako auditorioak. Dagoeneko ehun profesionaletik gora eman dute izena parte hartzeko, udal iturriek adierazi dutenez. Eta apuntatzeko aukera badago oraindik Gatazka Eraldatzeko Unibertsitate Zentrora (GEUZ) mezua bidaliz, ondoko helbide elektronikora: info[abildua]geuz.es. Bigarren urtez jarraian, Leioako Udalak, “Proposamen berriak eskola-elkarbizitzarako” jardunaldia aurkeztu nahi du, udalerri mailan elkarkidetza eta bake kultura sustatze aldera garatzen dituen ekimenen esparruan. Topaketa horren helburua da EAEko ikastetxeetan duela urte batzuetatik elkarbizitza-planen bidez burutzen ari diren zereginari laguntzea eta bultzada bat ematea: alde batetik, esku hartzeko ikuspegi eta estrategia berriak proposatuz; eta bestetik, hausnarketarako espazio bat eskainiz elkarbizitzarako eta bakerako heziketaz udalerrian. Argazkian, hainbat ikasle azterketa gaian / © Erandioko Udala.
Bigarren jardunaldi horretan, gonbidatutako adituek, bereziki, ikuspegi aplikatuak aurkeztuko dituzte, ikasgela eta ikastetxeetako elkarbizitzari lagunduko dioten praktika edo jarraibideetan zentratuz planteatutako gai desberdinetatik. Jardunaldi honen helburu nagusiak hiru dira; inguruko ikastetxeetako elkarbizitza-planen garapena bultzatzea, eskola-elkarbizitzaren arloko ekimen berriak ezagutaraztea; eta azkenik, ikasgeletako eta ikastetxeetako elkarbizitzari laguntzen dioten jarraibideak edo praktikak identifikatzea. Pertsona oso desberdinei zuzenduta dago jardunaldia, ikastetxeetako profesionalei, berritzeguneetakoei, beste hezkuntza eragile batzuei edota bake kultura eta elkarbizitzarekin zerikusia duten taldeei.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun