Guztia prest dago igande honetan, apirilak 1, Enekurin ospatuko den Kanpomartxorako. Hala ere, "den-dena eder jartzeko" jende bila dabil Berbots Erandion Euskaraz! elkarteak. Hartara, larunbatean, goizeko 9:30ean geratu dira Bekoa ikastetxean. Igandean ere hitzordua jarri dute Enekurin bertan, goizeko 9etan eta 10:00etan. Bestalde, Kanpomartxora joateko, doako autobusak egongo direla jakinarazi du Berbotsek. Gauzak horrela, 11:00etan hasita, Altzagako Santi Brouard plazatik abiatuko da garraioetako bat, 40 minutuan behin. Astrabuduako Iturribengoa zeharkaletik irtengo dena ere maiztasun berbera izango du, 11:10etik aurrera. Azken autobus horrek Erandio Landako elizan ere hartuko ditu Enekurirako bidaiariak. Altzagakoak, berriz, Arriagan ere egingo du geldialdia. Arratsaldean autobus bakarra egongo da: Astrabudua, Altzaga, Arriaga, Erandio Landa eta Enekuri zeharkatuko ditu. Argazkian, orain bi urte Lutxanan ospatu zuten Kanpomartxo jaia.
Antzina, Erandioko auzo ezberdinetako baserritarrak apirilaren hasieran aukeratutako egun eta toki batean batzen ziren Kanpomartxo izeneko festa egiteko. Egun horretan, musika doinuz eta dantzaz beteriko jai egunaz gozatzen zuten. Finean, erandioztar guztien arteko harremanak sendotzeko balio zuen ospakizunak. Bada, hainbat hamarkadatan galduta egon ostean, orain dela 18 urte berreskuratu zuen baserri giroko euskal jaia Berbots Erandion Euskaraz elkarteak. Ordutik hona, udalerriko txoko ezberdinak txandakatuz egin dute urtetik urtera. Gauzak horrela, eguerditik aurrera, dantzak, bertsolariak, jolasak... edukiko dituzte, egunean zehar, Enekurin batzen direnek.
Egitaraua:
11:30 Jai hasiera dantzariekin.
13:00 Mendibaiarte abesbatza.
13:30 Bertsolariak: Xabi eta Fredi Paya.
14:30 Herri bazkaria.
17:00 Betiko kantuak trikitiaz alaitua .
17:30 Erromeria umeentzat : “Txanogorritxu rock”.
18:00 Dantzaldia Luhartz taldearekin.
... eta egun osoan zehar: umeentzako arku jaurtiketa, gazteluak, tirolina, jolasak, tailerrak (karetagintza, aurpegi margotzea, bitxigintza, txapagintza), sorpresak...
Txosna, musika, taloa.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.