Gazteek esku-orrien bitartez zabaldutako adierazpena:
Hego Euskal Herrian 206.000 langabe daude une honetan. Hauetako askori langabezia saria amaitzen ari zaie eta murrizketen ondorioz, Diru Sarrerak Bermatzeko Errenta (IMI) galtzeko arriskuan daude beste asko. Gazteak, emakumeak eta etorkinak izango gara sektore kaltetuena. Kopuru totaletik %28 gazteak direlarik.
Alokairua sustatzeko gazteoi emandako 210 euroko laguntza ere izoztu egin dute eta ez dute laguntza berririk emango. Azken datuen arabera, bankuek egunero 8 etxebizitza husten jarraitzen duten bitartean, gazteok etxebizitza bat alokatu eta duintasunez bizi ahal izateko egun irabazten dugunaren ia bikoitza irabazi beharko genuke.
Alternatibarik badago, ordea. Burujabetza politiko eta ekonomikoa behar dugu euskal herritarrok, guk geure beharrak geuk nahi dugun bezala kudeatu ahal izateko.
- Hasteko, merkatuen diktadurari aurre egin eta herritarron interesak lehenetsi behar dira, eragile eta herritarron parte hartzeko eskubidea bermatuz.
- Espekulazioari eskuak moztu behar zaizkio. Ekonomia erreala sustatuz eta tokiko beharrak asez, enplegua sor daiteke. Murrizketak eten eta sektore publikoa indartu herritar guztion ongizatea bermatzeko. Banku publikoa behar dugu, espekulazioa amaitu eta herritarron beharrak aseko dituena.
- Arlo ekonomiko, laboral eta fiskalean tresnak gure esku behar ditugu. Iruzur fiskalari aurre egin eta sistema fiskal justuagoa osatzeko. Lan Harremanetarako Euskal Esparrua behar dugu gure lan baldintzak bertako herritarren beharren arabera zehazteko.
-Garapen jasangarria gezurra da. Kapitalismoak izadi osoa zulora darama abiadura bizian. Bizi ereduaren gaineko sakoneko eztabaida egiteko garaia da, norabidea aldatu nahi badugu.
Helburua lortzeko bidean ezinbestekoa da egunero gure inguruan ikusten ditugun bidegabekeriei aurre egitea eta alternatibak plazaratzea: etxebizitzen husteei aurre eginez, kaleratzeak salatuz, lan baldintza duinen alde borrokatuz, behar ez ditugun proiektuak geraraziz... eta batez ere...
Kalera ateraz! M29 greba orokorra! Denok kalera!
Gazteak grebara deitzeko ekintza Algortan
Kimika ikasketak ateratzeko bankuari mailegua eskatu behar izan zion laguna eta hura astintzen ari zen BBVAko bankaria irudikatuz, martxoaren 29ko greba orokorrera deitu dute Algortako gazte independentistek. Telletxe plazan egindako antzezpenaren bitartez, Espainiako Gobernuak onartutako lan erreformak zein murrizketek "kale gorrian" utziko dituztela salatu dute. Aurretik, obretarako aldamioa erabiliz, "M29 grebara! Denok kalera! Zuen aberastasuna gure miseria!" irakur zitekeen pankarta zintzilikatu dute zazpi solairutako Telletxe kaleko eraikin batean. Beste horrenbeste egin dute metro geltoki sarrerako egiturara igoz: "Zuen aberastasuna gure miseria. Gazteok M29 grebara!" leloa jarri dute bertan. Argazkian, metro geltokian jarritako pankarta.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun