Zortzi urte eta erdiko espetxe zigorra eskatu dute sexu abusuak egotzita atxilotu zuten Erandioko irakaslearentzat
Fiskalak zortzi urte eta erdiko espetxe zigorra eskatu du 5 eta 8 urte arteko zazpi ikasleei sexu abusuak egotzita atxilotu zuten Erandioko irakaslearentzat, "El Correo Español" egunkariak zabaldu duenez. 48 urteko C.S.G. gizonezkoa atzo epaitu zuten Bizkaiko Probintzia Auzitegiko seigarren atalean, ateak itxita, "adingabekoen identitatea babesteko asmoz". Hurrenez hurren, zazpi txikien aita-amek, akusatuak berak, Goikolanda ikastetxeko zuzendariak eta hiru irakaslek —defentsak horrela eskatuta—, hiru perituk eta ikerketan parte hartu zuten ertzainek deklaratu zuten atzoko saioan. Bitartean, areto kanpoaldean, babesa eta elkartasuna adierazi zioten C.S.G. irakasleari 30 bat senide, lagun eta lankidek. Adierazi zutenez, akusazioak "gezurra" dira eta "bizitza hondatu diote". Egun aske dago erandioztarra, zazpi adingabekoen kontrako jarraikako sexu abusu delitua leporatzen diotela. Argazkian, Goikolanda ikastetxe ingurua artxiboko irudian / © Erandioko Udala.
Erandioko Goikolanda ikastetxeko irakaslea Basauriko espetxera bidali zuten 2011ko urtarrilaren 11n, aurreko egunean adin txikiko ikasleei sexu gehiegikeriak egitea egotzita atxilotu ondoren. Eusko Jaurlaritzaren Herrizaingo Sailak zabaldu zuenez, ustezko erasotzailea eskola-orduak erabiltzen ei zituen sexu-abusuak egiteko. Aurreneko salaketa bost urteko ikasle baten gurasoek jarri zuten, ustez euren haurrak ikastetxean sexu gehiegikeriak jasaten zituela ohartaraziz. Hori dela medio, ikerketa jarri zen abian eta hurrengo hilabeteotan irakaslea kontrolatzeko bideo-zaintza sistema jarri zuten bere gelan. Bertan lortutako irudiek akusazioak frogatzeko erabili zituzten atzoko epaiketan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun