Leioako herrigunean pertsiana erdi jaitsita duten denda eta taberna batzuk izan ezik, eragin handia izan du gaurko Hego Euskal Herriko sindikatu guztiek deitutako greba. Greba batzordeak zein Leioako Langabetuen Asanbladak mobilizatutako piketeak, 100 lagun baino gehiago, "ez dute lan asko izan" Arkaitz Fullaondo Bilduko zinegotziak aitortu duenez. Izan ere, Aterpe gaztegunean ziren beharginek ateak itxi dituzte grebalarien bisitaren ostean, udal zerbitzuetan ia erabatekoa izan dela jarraipena. Gainera, aurreko grebetan irekita mantendu ziren banku, ostatu eta komertzio asko itxita egon dira gaur. Herrigunean ez ezik gauza bera suertatu da Artea merkataritza gunean, bertan Eroskiko kooperatibistek eta langileek lan erreformaren aurka kalera ateratzea erabaki zuten. Bertako denda askok ere pertsianak jaitsi ditu gaur. Leioa eta Erandioko campusa ere hutsik eman du goiz osoa. Herrian suertatu den istilu bakarra goizean Avanzadako errepidean jarritako suzko barrikadak izan dira. Argazkian, goizean ia 200 lagun batu dituen manifestazioaren ostean grebalariak pozik solasean Bulebarrean.
Besteak beste, honako datuak eskaini ditu bertoko Greba Batzordeak: Administrazioari dagokionez dena itxita egon da, bulego teknikoa izan ezik. Osasun-etxean, ezarritako zerbitzu minimoak bete behar zituzten langileek baino ez dira aritu. Herriko merkataritzaren %80 itxita egon da, gutxi gora behera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun