Goizean Avanzadako errepidetik zihoazela, Algortatik kotxe karabanan abiatutako zortzi autoak geldiarazi ditu Ertzaintzak. Gainera, gidarietako bati agiriak eskatu eta hainbat ibilgailuren matrikula zenbakiak hartu dituzte agenteek. Astrabuduako errotondatik aurrera, berriz, polizia autonomikoaren bi furgoneta izan dituzte atzetik. Hori bukatuta, Telletxe plazatik abiatu dira saltokiz saltoki greba orokorraren aldeko 40 bat lagun. Ertzaintzaren bi patruila izan dituzte uneoro "zaintzan", baina ez da gorabeherarik izan. Tarteka, polizien bi furgoneta ere agertu zaizkie. Greba batzordeko kideek adierazi dutenez, "aurrekoetan baino askoz denda gehiago" itxi dute pertsiana gaurkoan Algortan eta Getxon; Alkartetxea barne. Horren adibide bezala, Torrene kaleko merkatua zarratuta dago guztiz. Argazkian, piketeetako hainbat kide Algortako batzokiko taberna aurrean.
Taberna eta denda gehienak itxita daude Algorta erdigunean. Lan handiagoa izan dute piketeetako kideek banku, aurrezki kutxa eta supermerkatuak ixten. Hala ere, aurreko greba orokorretan ez bezala, behin piketeetako kideak joanda, ez dute berriro pertsiana igo gehienek. Goizeko 11ak helduta, Bilboko manifestaziorako bidea hartu dute kotxe karabanak askok; eta, bizikletan, Telletxen batutako 30 lagun inguruk.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun